Úndistanda qazaqstandyq bapkerge izdeý jarııalandy
ASTANA. KAZINFORM – Qazaqstandyq velosport jattyqtyrýshysy Maqsat Aıazbaev Úndistanda kámeletke tolmaǵan sportshyny zorlady degen kúdikke ilindi. Qazaqstannyń Syrtqy ister mınıstrligi atalǵan jaǵdaıǵa qatysty túsinik berdi.
The Times of India basylymynyń málimetinshe, oqıǵa 13 qyrkúıekte Patıala qalasyndaǵy Netadjı Sýbhas atyndaǵy Ulttyq sport ınstıtýtynyń aýmaǵynda bolǵan. Kámeletke tolmaǵan sportshy 18 qyrkúıekte polıtsııaǵa júgingen. Maqsat Aıazbaevty izdestirý úshin birneshe polıtsııa toby qurylǵan.
Qazaqstan velosport federatsııasynyń málimetinshe, Maqsat Aıazbaev sońǵy jyldary Qazaqstannan tys jerde Úndistan tarapymen jasalǵan kelisimshart boıynsha jumys istep, Úndistan ulttyq quramasyn jattyqtyrǵan. Qazirgi ýaqytta onyń Qazaqstan quramasyna qatysy joq.
Federatsııa málimetinshe, Úndistanda qylmystyq is qozǵalǵan, al tergeý kezinde jattyqtyrýshynyń qyzmeti toqtatylǵan.
QR Syrtqy ister mınıstrliginiń resmı ókili Janbolat Úsenov vedomstvo Qazaqstan azamatyna qatysty jaǵdaıdan habardar ekenin málimdedi.
– Mınıstrlik Úndistandaǵy Qazaqstan azamatyna qatysty jaǵdaıdan habardar. Qazaqstandyq dıplomattar atalǵan azamattyń týystarymen baılanysta. Oǵan konsýldyq-quqyqtyq kómek kórsetilip jatyr. Mınıstrlik bul máseleni baqylaýda ustap otyr, – dedi Janbolat Úsenov.
Aıta keteıik, Túrkistan oblysynda bes jyl boıy halyqaralyq izdeýde júrgen sheteldik ustaldy.
