Úndistanda kadr tapshylyǵynan 85 áýe reısi toqtady
ASTANA. KAZINFORM – Úndistannyń bıýdjettik Air India Express áýe kompanııasy qyzmetkerlerdiń jetispeýshiligi saldarynan ekinshi kún qatarynan kóptegen reısterdi toqtatýǵa májbúr. Ushý kestesiniń buzylýy týraly aqparatty tasymaldaýshynyń baspasóz qyzmeti málimdedi.
«Búgin 283 reısti oryndaımyz. Biz barlyq resýrstardy jumyldyrdyq. Air India 20 marshrýt boıynsha reısti júzege asyryp, bizge qoldaý kórsetedi. Dese de, 85 reıs toqtatyldy. Biz jolaýshylardan áýejaıǵa barar aldynda reıstiń ushý-ushpaý jónindegi aqparatty anyqtap alýyn suraımyz», delingen keshe túnde taraǵan habarlamada.
Reıs úsh saǵattan artyq keshiktirilgen jaǵdaıda áýe kompanııasy shyǵyndardyń tolyq ótelýine nemese reısti qosymsha tólemsiz keıingi kúnge aýystyrýǵa kepildik bermek.
TASS agenttiginiń habarlaýynsha, ótken sársenbide áýe kompanııasy kóptegen qyzmetkerdi jumystan shyǵarǵan. Atap aıtsaq, 25 aǵa stıýardessa sebepsiz jumystan jaltarǵany úshin bosatylǵan. Sáıkesinshe, kadrlarmen tolyqtaı qamtylmaǵan ushaqtar áýege kóterilmegen.
