Úndistanda hımıoterapııany almastyrýy múmkin qaterli isikke qarsy preparat ázirlendi
ASTANA. KAZINFORM — Úndi ǵalymdary qaterli isik jasýshalarynyń ishinde ǵana belsendi bolatyn jańa preparat ázirledi. Ol hımıoterapııaǵa balama bolýy múmkin. Bul týraly Úndistannyń Ǵylym jáne tehnologııa mınıstrligi málimdedi, dep habarlaıdy BelTA.
RK-251 dep atalatyn preparatty Úndistannyń Ǵylym jáne tehnologııa salasyndaǵy ozyq zertteýler ınstıtýty men Gývahatı qalasyndaǵy Úndistan tehnologııalyq ınstıtýtynyń ǵalymdary ázirledi.
Mınıstrliktiń túsindirýinshe, qaterli isik jasýshalarynyń ishinde ǵana áser etýge arnalǵan jańa «aqyldy» preparat kóptegen jaǵdaıda saý jasýshalarǵa zııan keltiretin dástúrli hımıoterapııany almastyrýy múmkin.
RK-251 saý tinderde belsendi emes kúıde saqtalyp, negizinen isik jasýshalarynyń ishinde belsendiriledi. Vedomstvonyń málimetinshe, preparattyń áser etý mehanızmi qaterli isik jasýshalarynda belsendi ottegi túrleriniń deńgeıi joǵary bolýyna negizdelgen.
Zertteý barysynda RK-251 preparatynyń aıqyn ýyttylyq belgileri anyqtalmaǵan. Bul onyń qaýipsizdigi men tıimdiligin odan ári zertteýge múmkindik bar ekenin kórsetedi.
Sonymen qatar Úndistannyń Ǵylym jáne tehnologııa mınıstrligi preparattyń ázirge klınıkaǵa deıingi zertteý kezeńinde ekenin atap ótti. Onyń adam aǵzasyna qoldanylý múmkindigin baǵalaý úshin qosymsha zertteýler qajet.
Aıta keteıik, AQSh-ta qaterli isikke qarsy tájirıbelik vaktsına keıbir naýqastardy dertinen aıyqtyrdy.
