Úndistanda feıerverk fabrıkasynda bolǵan jarylystan 23 adam qaza tapty
ASTANA. KAZINFORM – Úndistannyń ońtústigindegi Tamılnad shtatynda feıerverk shyǵaratyn fabrıkada bolǵan kúshti jarylys saldarynan keminde 23 adam qaza taýyp, taǵy alty adam jaraqat aldy, dep habarlaıdy India TV.
Jarylys Vırýdhýnagar okrýgine qarasty Kattanarpattı aýylyndaǵy Mýthýmanıkamǵa tıesili Vanaja kásipornynda bolǵan. Oqıǵa kezinde aýmaqta 100-den astam jumysshy bolǵan, olardyń shamamen 30-y óndiristik jumystardy atqaryp jatqan.
Zardap shekken alty adamnyń tórteýiniń jaǵdaıy aýyr. Olar Vırýdhýnagar memlekettik medıtsınalyq kolledjinde em qabyldap jatyr. Jaralanǵandardyń úsheýi – denesiniń 60 paıyzdan astamy kúıgen áıelder.
Aldyn ala málimetterge sáıkes, jarylystyń oshaǵy ǵımarattyń aldyńǵy bóliginde ornalasqan, onda jumysshylar shıkizatty óńdeý jáne sońǵy óndiristik operatsııalarmen aınalysqan. Jarylys saldarynan keminde úsh bólme tolyq qırap, birneshe kórshiles nysan búlingen. Qutqarý jumystary feıerverkterdiń qaıta-qaıta jarylýyna baılanysty qıyndaǵan, úıindi astynda adamdar qalýy múmkin.
Bastapqy tergeý nátıjesi boıynsha, kásiporynda Munaı jáne jarylǵysh zattar qaýipsizdigi uıymynyń (PESO) lıtsenzııasy bolǵan.
Bul oqıǵa óńirde jyl basynan bergi eń iri óndiristik apat sanalady. Buǵan deıin osy okrýgtegi Vembakottaı aýdanynda bolǵan uqsas jarylystan tórt adam kóz jumǵan.
Úndistannyń premer-mınıstri Narendra Modı qaza tapqandardyń otbasylaryna kóńil aıtty.
Aıta keteıik, bıyl naýryzda Úndistannyń Maharashtra shtatyndaǵy jarylǵysh zattar óndiretin zaýytta bolǵan jarylys saldarynan 17 adam qaza taýyp, taǵy 18 adam jaralandy.
