Úndistanda emtıhan aldyndada Telegram-ǵa shekteý qoıyldy

Úndistannyń Ulttyq testileý agenttigi (NTA) engizilgen sharalardy qoldap, onyń emtıhandy alaıaqtyq áreketter men talapkerler arasynda dezınformatsııa taralýynan qorǵaýǵa kómektesetinin málimdedi, dep habarlaıdy Hindustan Times. NEET-UG 2026 qaıta tapsyrý emtıhany 21 maýsymǵa belgilengen.

Úndistannyń Elektronıka jáne aqparattyq tehnologııalar mınıstrliginiń buıryǵyna sáıkes, Telegram messendjerine qoljetimdilik emtıhan ótkizý kezeńinde jáne odan keıin de shekteledi. Sonymen qatar, elde 30 maýsymǵa deıin habarlamalardy redaktsııalaý fýnktsııasy ýaqytsha óshiriledi.

NTA málimetinshe, bul shekteýler Telegram arqyly talapkerlerdi aldaǵan alaıaq toptardyń áreketine baılanysty engizilgen. Olar arnaıy arnalar arqyly aqshaǵa emtıhannyń «naqty tapsyrmalaryn» jáne qaıta tapsyrý testiniń materıaldaryna qoljetimdilikti usynyp kelgen.

Bılik ásirese habarlamalardy óńdeý fýnktsııasyna nazar aýdarǵan. Retteýshiniń pikirinshe, bul múmkindik emtıhan materıaldarynyń taraǵany týraly jalǵan dálelder jasaý úshin qoldanylýy múmkin: alaıaqtar eski habarlamalardyń mazmunyn ózgertip, bastapqy jarııalanǵan ýaqytyn saqtap qalady.

Vedomstvo bul shekteýler messendjerdiń barlyq qoldanýshylaryna áser etetinin moıyndady.

Al Telegram óz kezeginde mundaı sheshim Úndistandaǵy 150 mıllıon qarapaıym qoldanýshyny shekteıtinin, biraq emtıhan materıaldaryn taratqandarǵa áser etpeıtinin málimdedi.

— Bul buǵattaý eshteńeni toqtatqan joq. Aqparattyń taralýy basqa qosymshalarǵa aýysyp ketti. Biz bul máseleni sheshý úshin kóp jumys atqardyq — onyń derekkózi Telegram emes ekenine qaramastan. Sońǵy birneshe aptada biz Úndistanda emtıhan materıaldarynyń taralýyna jáne soǵan baılanysty alaıaqtyq shemalarǵa qatysy bar júzdegen arnany joıdyq. Sondaı-aq biz «óńdeldi» degen belgini aıqynyraq etip, derekterdi keıin ózgertý arqyly jasalatyn alaıaqtyqtyń aldyn alý sharalaryn kúsheıttik, — dedi Telegram negizin qalaýshy Pavel Dýrov.

Aıta keteıik, bıyl aqpan aıynda Telegram jelisiniń moderatorlary 234 945 top pen kanaldy buǵattady.