Úndistanda eki qaıyq aýdarylyp, keminde 11 qutqarýshy iz-túzsiz joǵaldy
ASTANA. KAZINFORM — Úndistannyń ońtústigindegi Telangana shtatynda eki qaıyq aýdarylyp, keminde 11 qutqarýshy iz-túzsiz joǵaldy. Bul týraly Kazinform agenttigi Sınhýaǵa silteme jasap habarlady.
Jergilikti bıliktiń málimetinshe, oqıǵa sársenbi kúni keshke arnasynan asqan Betýpallı kólinde bolǵan. Ol Telangana shtatynyń ákimshilik ortalyǵy Haıdarabad qalasynan shyǵysqa qaraı 274 shaqyrym jerde ornalasqan.
Qutqarý jumystaryna qatysyp júrgen mamandar mingen eki qaıyq ta aýdarylyp ketken.
Jergilikti sheneýnikterdiń habarlaýynsha, qutqarýshylar sý tasqyny saldarynan qıyn jaǵdaıǵa tap bolǵan bes balyqshyny evakýatsııalaýǵa bara jatqan.
Eske salaıyq, buǵan deıin Úndistannyń ońtústigindegi Andhra-Pradesh shtatyna «Mýrasý» qýatty tsıklony soǵyp, birneshe eldi mekendi sý basyp, joldarǵa zaqym kelgenin habarlaǵan edik.