Úndistanda dýatlonnan ótken halyqaralyq jarysta ásker sportshylary qola júldege ıe boldy
ASTANA. KAZINFORM — Qorǵanys mınıstrligi Sport komıteti — Armııa ortalyq sport klýbynyń komandasy Úndistanda ótken halyqaralyq áskerı-sporttyq oıyndarda (International Military Adventure Challenge Cup) sátti óner kórsetti.
Bul saıysqa Úndistan, Qazaqstan, Shrı-Lanka, Brazılııa, Qyrǵyzstan, Saýd Arabııasy, Býtan jáne Nepal elderinen kelgen 12 komanda quramynda 150-den astam sportshy qatysty.
Jarys erejesine saı D (dýatlon) baǵdarlamasyna qatysýshylar bir kún ishinde 9 saǵattyq belgilengen ýaqyt sheginde 80 shaqyrymnan astam qashyqtyqty baǵyndyrýy tıis boldy.
Qazaqstandyq sportshylar taýly jerdegi 21 shaqyrymdyq júgirý men taýly trassadaǵy 59,5 shaqyrymdyq velojarystan turatyn saıystyń barlyq kezeńderinen súrinbeı ótti.
Olar barlyq kedergilerdi sátti eńserip, 6 saǵat 46 mınýt 25 sekýnd kórsetkishimen D (dýatlon) baǵdarlamasynda jalpykomandalyq esepte úshinshi oryndy ıelendi.
Komanda jetekshisi polkovnık Erkebulan Túsiphanov elimizdiń mundaı formattaǵy jarysqa alǵash ret qatysyp otyrǵanyn atap ótti.
— Komanda bar kúsh-qýatyn sarqa jumsady. Taýly trassa aıtarlyqtaı qıyndyq týǵyzdy. Sportshylardyń arasynda jeńil jaraqat alǵandar da boldy. Soǵan qaramastan, bizdiń jigitter bar kúsh-jigerin jınap, jaýyngerlik minez tanytyp, tuǵyrdyń úshinshi satysyna kóterildi, — dedi ol.
Jarys qorytyndysy boıynsha D (dýatlon) sanatynda jalpykomandalyq esepte birinshi oryndy Úndistan Áskerı-áýe kúshteriniń komandasy, ekinshi oryndy Býtan quramasy, úshinshi oryndy Qazaqstan komandasy ıelendi.
Aıta ketelik qurlyq áskerinde serjanttardyń jaýyngerlik jáne basqarý daıarlyǵy kúsheıtilgeni týraly jazǵan edik.