Úndistanda dinı mereke kezinde 18 adam kóz jumdy

ASTANA. KAZINFORM — Úndistan astanasy Nıý-Delıdiń temirjol vokzalyndaǵy qaıǵyly jaǵdaı qurbandarynyń sany 18-ge jetti. Adamdar dinı mereke úshin úıine asyǵyp, vagondarǵa umtylǵanda aıaq astynda taptalyp qalǵan, dep habarlaıdy The Hindu basylymy.

Oqıǵa úndilerdiń eń aýqymdy festıvali — Kýmbha Mela ótetin oryn Praıagradj qalasyna attanǵaly turǵan poıyzdardan oryn alý kezinde bolǵan.

Delı polıtsııasynyń habarlaýynsha, Nıý-Delı temirjol vokzalyndaǵy kepteliske «ýaqytynan kesh qalamyn» dep asyqqan jolaýshylardyń Prayagraj Express jáne Prayagraj Special poıyzy baǵyty arasynda adasyp, abdyrap qalýy sebep bolǵan.

Qaıtys bolǵan 18 adamnyń úsheýi jeti, segiz jáne on bes jastaǵy qyzdar. Taǵy bir 24 jastaǵy áıel, 35-45 jas aralyǵyndaǵy toǵyz áıel men 70 jastaǵy bir ájeı de qaza tapty. Sondaı-aq 12 jastaǵy bala men 25, 45 jáne 47 jastaǵy úsh er adam qaza tapqan. Jaralanǵan 15 adamnyń toǵyzy er adam, altaýy áıel. Olardyń úsheýi aýyr, 12-si jeńil jaraqat alǵan.

— Jalpy 15 adam zardap shekti. Olardyń kópshiliginiń jaǵdaıy turaqty, jaraqattary bar, — delingen habarlamada.

Buǵan deıin, Úndistannyń Praıagradj qalasynda ótip jatqan Kýmbha Mela festıvalinde bolǵan adamdardyń qaqtyǵysynan 30-ǵa jýyq úndistandyq qaza taýyp, 90-ǵa jýyǵy jaraqat alǵanyn jazǵan edik.

Sondaı-aq, Úndistanda 10-nan astam adamdy poıyz qaǵyp, qaza tapty.