Úndistanda birneshe aı boıy kemede bolǵan qazaqstandyq elge qashan oralady
ASTANA. KAZINFORM — Úndistanda birneshe aıdan beri sot sheshimimen qozǵalysyna shekteý qoıylǵan Unity tankeriniń ekıpaj músheleri elderine qaıta bastady. Al kemede qalǵan teńizshilerdiń arasynda Qazaqstan azamaty bar. Syrtqy ister mınıstrligi onyń elge oralýyna qatysty qandaı jumys júrgizilip jatqanyn aıtyp berdi.
29 qazanda ekıpajdyń alǵashqy jeti múshesine kemeden ketýge ruqsat berildi. Olardyń altaýy — Reseı, bireýi Mysyr azamaty. Teńizshiler Úndistannyń Odısha shtatynyń ákimshilik ortalyǵy Bhýbaneshvar qalasyna jetkizildi. Olar 31 qazanda óz elderine ushýy tıis.
Bastapqyda tanker bortynda 23 adam bolǵan. Onyń 20-sy — Reseı, 2-eýi — Mysyr, 1-eýi — Qazaqstan azamaty.
Qazaqstan SІM málimetinshe, qazir otandasymyzdyń Úndistannan elge qaıtýy úshin qajetti qujattardy rásimdeý jumystary júrgizilip jatyr. Qazaqstannyń Úndistandaǵy elshiligi jaǵdaıdy baqylaýda ustap otyr.
— Azamatymyzdy elge qaıtarý úshin Úndistannyń Syrtqy ister mınıstrligimen jáne basqa da quzyrly organdarymen birlesken jumys júrgizilip jatyr. Úndistan soty ustalǵan kemeniń ekıpajyn aýystyrý týraly sheshim qabyldady. Qazirgi ýaqytta vıza rásimdeý jáne azamatymyzdy elge qaıtarý máseleleri sheshilýde, — dep málimdedi mınıstrlik.
Kamerýn týymen júzetin Unity tankeri 2026 jylǵy 11 mamyrdan beri Úndistannyń Paradıp portynda tur. Jergilikti janarmaı jetkizýshi kompanııa men keme ıesiniń arasyndaǵy qarjylyq daýǵa baılanysty sot tankerdiń porttan shyǵýyna tyıym salǵan.
Saldarynan ekıpaj músheleri birneshe aı boıy kemeden kete almaǵan. Úndistandyq BAQ málimetinshe, osy ýaqyt ishinde teńizshiler azyq-túlik pen aýyzsý tapshylyǵyna tap bolǵan. Sondaı-aq olardyń jalaqysy da ýaqytyly tólenbegen.
Eske salaıyq, 17 qyrkúıekte Qazaqstannyń Syrtqy ister mınıstrligi tankerdiń ustalǵanyn rastaǵan bolatyn. Sol kezde vedomstvo jaǵdaıdy retteýge járdemdesýdi surap, Úndistan tarapyna dıplomatııalyq nota joldaǵanyn habarlady.
17 qazanda bortynda Qazaqstan azamaty bar tankerdiń satylymǵa shyǵarylýy múmkin ekeni habarlandy. Teńizshilerdiń jaqyndarynyń aıtýynsha, olardyń ornyna basqa ekıpaj kelmeıinshe, kemeden ketýine ruqsat berilmegen.
