Úndistanda beti búrkengen adamdarǵa zergerlik dúkenderge kirýge tyıym salyndy
ASTANA. KAZINFORM — Úndistannyń Bıhar shtatynda betiniń kóp bóligi jabylǵan adamdarǵa zergerlik dúkenderge kirýge tyıym salynǵany belgili boldy, dep habarlaıdy Anadoly.
India Today málimetinshe, Úndistannyń jalpy zergerler federatsııasy (AIJGF) Bıhardaǵy zergerlik dúkenderge býrka, maska nemese dýlyǵa kıip kiretin, ıaǵnı betiniń kóp bóligin jaýyp turǵan adamdardyń kirýin shektedi.
Bul shara urlyq pen tonaý derekteri kóbeıip jatqan jaǵdaıda qaýipsizdikti qamtamasyz etý maqsatynda engizilip, búginnen bastap búkil shtatta qoldanysqa endi.
Jańa ereje aıasynda Bıhardaǵy zergerlik dúkenderdiń kireberisine býrka, maska nemese dýlyǵaǵa tyıym salatyn eskertý belgileri ornatyldy.
Zergerler qaýymdastyǵy bul ereje jynysyna qaramastan barlyq adamǵa qoldanylady jáne ýaqyt óte qaıta qarastyrylatynyn atap ótti. Qazirgi kezde Bıhardaǵy zergerlik dúkenderge kirý úshin bet ashyq bolýy mindetti.
Samastıpýr aımaǵynan shyqqan depýtat Shambhavı Chaýdharı jańa erejege qatysty pikir bildirip, bul sharanyń dinge qatysy joq ekenin málimdedi.
— Bul — qaýipsizdik máselesi. Tyıym tek býrka men hıdjabqa qatysty emes, sonymen qatar dýlyǵa men bet jabatyn basqa elementterge de qoldanylady, — dedi Chaýdharı.
Budan buryn Úndistandaǵy sý daǵdarysy sýsyn óndiretin kompanııalarǵa qaýip tóndirip otyrǵanyn jazǵanbyz.