Úndistanda aınalmaly alyp átkenshek qulap, 30-dan astam adam zardap shekti
ASTANA. KAZINFORM – Úndistannyń halqy eń tyǵyz ornalasqan Ýttar-Pradesh shtatynda túngi jármeńke kezinde bıiktigi 18 metrlik aınalmaly sholý dóńgelegi qulap, keminde 30 adam jaraqat aldy, dep habarlaıdy The Independent basylymy.
Oqıǵa Kýshınagar okrýgindegi Bhaınsaha aýylynda bolǵan. Munda jyl saıyn ótetin jármeńke uıymdastyrylǵan ejelgi ǵıbadathana keshenine júzdegen adam jınalǵan.
Kýágerlerdiń biri túsirgen vıdeoda áıelder men balalardy qosa alǵanda ondaǵan adam otyrǵan alyp átkenshektiń kenet bir jaqqa qısaıyp, artynsha jerge qulaǵan sáti kórinedi.
Oqıǵadan keıin kýágerler birden kómekke umtylyp, zardap shekkenderdi metall konstrýktsııalardyń astynan shyǵara bastaǵan.
Jergilikti BAQ málimetinshe, attraktsıonda shamamen 80 adam bolǵan. Ol eki aınalym jasap úlgergennen keıin syqyrlaǵan dybys shyǵyp, qurylǵy opyrylyp túsken.
Keminde 10 adam aýyr jaraqat alǵan, qalǵandarynyń jaraqaty jeńil.
Polıtsııanyń habarlaýynsha, qutqarý jumystary dereý bastalǵan. Oqıǵa ornyna alty jedel járdem kóligi jiberilip, zardap shekkender jaqyn mańdaǵy medıtsınalyq mekemelerge jetkizilgen.
Kýágerlerdiń sózin NDTV Hindi jańalyq saıty da keltirgen. Aıtýlarynsha, attraktsıon jumys istep turǵan sátte tirekterdiń biri synyp, sonyń saldarynan búkil qurylym qulaǵan.
Jármeńke jyl saıyn Naraıanı ózeniniń jaǵasyndaǵy ǵıbadathana aýmaǵynda ótedi. Oǵan kórshiles Bıhar shtatynan kelgen zııaratshylarmen qatar, kórshi Nepal elinen de kelýshiler kóp jınalady.
Aldyn ala málimet boıynsha, buǵan deıin tehnıkalyq aqaý baıqalǵan. Soǵan qaramastan operator attraktsıondy paıdalanýdy jalǵastyrǵan bolýy múmkin, bul salǵyrttyqqa qatysty kúdikti kúsheıtip otyr.
Qazir bılik qylmystyq is qozǵap, qaýipsizdikke qatysty mindetti tekserýlerdiń júrgizilgen-júrgizilmegenin anyqtap jatyr.
Eske sala ketsek, Taılandta qurylys krany qulap, jolaýshylar poıyzy relsten shyǵyp ketti. Sońǵy málimetter boıynsha, kem degende 22 adam qaza tapty.
