Úndistanda áskerıler narazylyq bildirgen fermerlerge kózden jas aǵyzatyn gaz atty

ASTANA. KAZINFORM – Nıý-Delıge qaraı bet alǵan narazy úndilik fermerler qaýipsizdik kúshterimen ekinshi kúnnen beri qaqtyǵysyp jatyr, dep habarlaıdy Reuters. 

Seısenbi kúni tańerteń fermerler kásipodaq jetekshileri men úkimet arasyndaǵy birqatar aýylsharýashylyq daqyldarynyń eń tómengi baǵasy týraly sheshimge kele almaǵan kelissózderden keıin fermerler narazylyq sherýin bastady.

Qaýipsizdik kúshteri sherýshilerdi Pendjab pen Harıanany bólip turǵan Shambý shekarasynda toqtatty.

Harıana polıtsııasy ókiliniń habarlaýynsha, búginde kózden jas aǵyzatyn gaz qoldanylyp, bul shara jaǵdaı baqylaýǵa alynǵansha jalǵasady.

«Biz premer-mınıstrdiń fermerlermen baılanysqa shyǵyp, sóıleskenin qalaımyz», - dedi úndilik ANI aqparat agenttigine Punjab Kisan Mazdoor Sangharsh komıtetiniń Bas hatshysy Sarvan Sıngh Pander.

Osy arada úkimet fermerlerge kelip, máseleni talqylaýdy surady.

«Biz fermerler kásipodaqtarymen syndarly jáne oń dıalog qurý úshin kúsh salýdy jalǵastyramyz», - dedi sársenbi kúni eldiń Aýyl sharýashylyǵy mınıstri Ardjýn Mýnda tilshilerge.

ANI túsirgen fotosýretterinen Nıý-Delımen shektesetin basqa aımaqtarda barrıkadalar, sym tormen qaptalǵan tsement bloktary, bos konteınerler jáne basqa da kedergiler sııaqty qatań qaýipsizdik sharalaryn kórýge bolady.

Buǵan deıin habarlanǵandaı, Úndistan polıtsııasy 2021 jyly ýáde etilgen ónim baǵasyn kóterýdi talap etip, Nıý-Delıge jetýdi josparlaǵan fermerlerdiń qozǵalysyn toqtatý úshin joldardy jaýyp tastady.