Úndistanda apatqa ushyraǵan Air India ushaǵy dárigerlerge arnalǵan jataqhana ǵımaratyna qulaǵan

NЬıÝ-DELI. KAZINFORM — Úndistannyń batysynda apatqa ushyraǵan Air India áýe kompanııasynyń ushaǵy dárigerlerge arnalǵan jataqhana ǵımaratyna qulaǵan. Bul týraly jergilikti polıtsııa ofıtseri brıfıng barysynda málimdedi, dep jazdy TASS.

Apat ornyna barlyq qyzmetter jumyldyryldy, dep habarlady jergilikti polıtsııa ofıtseri.

— Aldyn ala málimet boıynsha, Londonǵa baǵyt alǵan Air India áýe kompanııasynyń ushaǵy dárigerler jataqhanasyna qulaǵan. Polıtsııa men basqa da qyzmetter 2-3 mınýt ishinde oqıǵa ornyna kelip jetti. Munda barlyq tıisti qyzmetter jumys istep jatyr, — dedi ol.

Boeing 787 Dreamliner ushaǵy Úndistannyń batysyndaǵy Ahmedabad qalasynyń áýejaıynan ushyp shyqqannan keıin birden qulaǵan. Ol Ahmedabadtan Londonǵa baǵyt alǵan reıs bolǵan. Ushaq bortynda 242 adam bolǵan. NDTV telearnasynyń habarlaýynsha, apattan aman qalǵandar bar.