Úndistanda álemdegi eń bıik temirjol kópiri ashyldy

ASTANA. KAZINFORM – Úndistannyń Premer-mınıstri Narendra Modı Kashmır jazyǵyn eldiń basqa óńirlerimen baılanystyratyn Chenab temirjol kópiriniń ashylý rásimine qatysty. Bul týraly uza.uz habarlady. 

Uzyndyǵy 1,3 shaqyrymdy quraıtyn jáne teńiz deńgeıinen 359 metr bıiktikte ornalasqan bul kópir – jer betindegi eń bıik temirjol ótkeli. 

– Chenab temirjol kópiri – tek ınjenerlik keremet qana emes, sonymen qatar Djammý men Srınagar arasyndaǵy baılanysty nyǵaıtatyn mańyzdy nysan, - dep jazdy Modı X áleýmettik jelisinde.

Sonymen qatar Úndistan Premer-mınıstri Djammý men Kashmır odaǵy aımaǵyndaǵy baılanysty kúsheıtýge baǵyttalǵan Katra qalasynda jalpy quny 460 mıllıard rýpııge (shamamen 5,4 mıllıard AQSh dollary) baǵalanǵan ınfraqurylym jobalaryn iske qosty.

Eske sala keteıik, buǵan deıin Mońǵolııa men Qytaı arasyndaǵy ekinshi temirjoldyń qurylysy bastalǵanyn jazǵan edik.