Úndistan jaǵalaýynda keme apatqa ushyrap, 22 adam joǵalyp ketti
ASTANA. KAZINFORM — Úndistannyń shyǵys jaǵalaýynda júk kemesi sýǵa batqannan keıin joǵalyp ketken 22 teńizshini izdeý jumystary jalǵasyp jatyr. Ocean Winner kemesiniń bortynda 24 ekıpaj múshesi bolǵan. Olardyń ekeýi — Qytaı azamattary qutqaryldy, dep habarlaıdy Reuters.
Panama týyndaǵy keme Úndistannyń Paradıp portynan 240 teńiz mıli qashyqta sýǵa batqan. Qutqarylǵan teńizshilerdiń aıtýynsha, Ocean Winner qatty qısaıyp, shamamen 8 mınýttyń ishinde sý astyna ketken.
Úndistannyń jaǵalaý kúzeti men áskerı-teńiz kúshteri oqıǵa ornyna izdeý-qutqarý jumystaryna birneshe keme jiberdi. Іzdeý jumystaryna basqa da memlekettik qyzmetter tartyldy.
Habar-osharsyz ketkenderdiń arasynda 18 Qytaı azamaty, úsh Mıanma azamaty jáne bir Bangladesh azamaty bar. Kemede bolǵan Qytaıdyń eki teńizshisi qutqaryldy.
Aldyn ala málimet boıynsha Ocean Winner Qytaıǵa temir alyp bara jatqan. Keme juma kúni Úndistannyń Paradıp portynan shyǵyp, ashyq teńizde sýǵa batqan.
Apattyń naqty sebebi ázirge anyqtalǵan joq. Úndistannyń Teńiz ákimshiligi ókilderiniń aıtýynsha, alǵashqy 12 saǵattan keıin tiri qalǵandardy tabý múmkindigi ádette tómendeıdi. Soǵan qaramastan izdeý-qutqarý operatsııasy jalǵasyp jatyr.
Aıta keteıik, Zımbabvedegi jasandy Karıba kólinde keme aýdarylyp, 92 adam qaza tapty.
