Úndistan sýasty mınalaryn synaqtan ótkizdi
NЬıÝ-DELI. KAZINFORM — Úndistannyń Áskerı-teńiz kúshteri men Qorǵanys zertteýleri uıymy (DRDO) kópmaqsatty sýasty mınalarynyń sátti synaqtan ótkenin habarlady. Bul týraly memlekettiń Qorǵanys mınıstrligi málimdedi, dep jazady TASS.
- Úndi ÁTK óz elinde jasalǵan, jasyryn kemeler men sýasty qaıyqtaryna qarsy baǵyttalǵan zamanaýı sýasty mınalary boıynsha sátti synaq ótkizdi, — delingen mınıstrlik habarlamasynda.
Vedomstvo málimetinshe, mına qoldanýǵa tolyq daıyn.
Úndistannyń Qorǵanys mınıstri Radjnath Sıngh synaqtarǵa qatysty pikirinde bul mına «Úndi ÁTK-niń sýasty soǵys júrgizý qabiletin odan ári arttyratynyn» atap ótti.
Nıý-Delı Pákistanmen qarym-qatynastyń ýshyǵýy aıasynda úndilik Djammý men Kashmır odaqtas aýmaǵynda bolǵan teraktiden keıin teńizde, áýede jáne qurlyqta birqatar áskerı tehnıkany synaqtan ótkizdi.
22 sáýirde Djammý men Kashmırdegi tanymal týrıstik Pahalgam qalasynda bolǵan terakt saldarynan 25 úndistandyq pen 1 nepaldyq qaza tapty. Úndistan bul shabýylǵa «Lashkar-ı-Taııba» toby men Pákistannyń barlaý qyzmetiniń qatysy bar ekendigin dáleldeıtin aıǵaqtardy anyqtaǵan. Osydan keıin Nıý-Delı men Islamabad ózara dıplomatııalyq shekteýler engizip, ekijaqty kelisimderdiń kúshin toqtatty jáne bir-biriniń áýe keńistigin jaýyp tastady. Eki tarap ta baqylaý syzyǵynda oq atý faktileri týraly habarlap, jaýap sharalaryn qolǵa alǵanyn aıtady.
4 mamyr kúni Úndistan Áskerı-áýe kúshteri shtabynyń bastyǵy áýe marshaly Amar Prıt Sıngh premer-mınıstr Narendra Modımen kezdesti. ÁÁK basshysy premer-mınıstrdi Pahalgamdaǵy terrorlyq shabýyldan keıin úkimet qarastyryp jatqan qarsy sharalar kontekstinde kúshterdiń daıyndyǵy týraly habardar etti.
Pákistan BUU Qaýipsizdik Keńesiniń shuǵyl otyrysyn ótkizýdi surady.