Úndistan premeri qashyqtan jumys isteýge qaıta oralýdy usyndy
ASTANA. KAZINFORM – Úndistan premer-mınıstri Narendra Modı Taıaý Shyǵystaǵy daǵdarystyń saldaryna baılanysty el azamattaryn pandemııa kezindegi tájirıbege qaıta oralýǵa shaqyrdy. Bul týraly TASS agenttigi habarlady.
Narendra Modı Haıdarabad qalasynda sóılegen sózinde koronavırýs pandemııasy kezinde qoldanylǵan qashyqtan jumys isteý, vırtýaldy kezdesýler men beınekonferentsııalar tájirıbesin qaıta engizý qajettigin aıtty.
– Koronavırýs kezinde biz úıden jumys istedik, vırtýaldy kezdesýler men beınekonferentsııalar ótkizdik. Biz buǵan úırenip qaldyq. Qazirgi ýaqyt talaby – osy tásilderge qaıta oralý, – dedi Narendra Modı.
Úndistan premeri shetel valıýtasyn únemdeý men ımporttyq energııa resýrstaryna táýeldilikti azaıtýdyń mańyzyn atap ótti. Onyń aıtýynsha, el azamattary tutyný daǵdylaryn qaıta qaraýy tıis.
– Orta tap arasynda shetelde toı ótkizý, shetelge saıahattaý jáne demalys uıymdastyrý keń taralyp barady. Osy daǵdarys kezeńinde kem degende bir jylǵa shetel saparlaryn keıinge qaldyrý týraly sheshim qabyldaýymyz kerek, – dedi ol.
Sonymen qatar Narendra Modı azamattardy merekeler kezinde bir jyl boıy altyn satyp alýdan bas tartýǵa shaqyrdy.
Úkimet basshysy janarmaıdy únemdep paıdalanýdyń da mańyzdy ekenin aıtty.
– Qazir benzın, dızel jáne gazdy barynsha únemdep paıdalaný qajet. Biz bul energııa resýrstaryn shetelden ımporttaımyz, sondyqtan tek qajetti kólemde ǵana tutynýǵa tyrysýymyz kerek, – dedi Narendra Modı.
Osyǵan baılanysty premer-mınıstr halyqty qoǵamdyq kólik pen temirjoldy kóbirek paıdalanýǵa úndedi.
– Metro bar jerde metromen júrińizder, bir baǵytta júretinder kólikti birge paıdalansyn, al júk tasymalynda temirjoldy qoldanyńyzdar. Munyń bári benzın men dızelge táýeldilikti azaıtady, demek shetel valıýtasyna táýeldilik te tómendeıdi, – dedi ol.
Aıta keteıik, buǵan deıin Irannyń AQSh-tyń soǵysty toqtatý týraly usynystaryna qalaı jaýap bergeni habarlanǵan edi.
