Úndistan Pákistannyń birneshe ushaǵyn atyp túsirdi

ASTANA. KAZINFORM – Úndistannyń qarýly kúshteri Pákistan ushaqtaryn eldiń áýe keńistigine kirgizbesten atyp túsirdi. Bul týraly brıfıng barysynda avıatsııa marshaly Avadesh Kýmar Bhartı málim etti, dep habarlaıdy reseılik TASS.

- Olardyń ushaqtarynyń bizdiń shekaramyzdan ótýine múmkindik bermedik. Biz birneshe ushaqty atyp túsirdik, - dedi ol.

Bhartı Úndistan áskerı áýe kúshteriniń shyǵynyna baılanysty suraqqa jaýap bermedi.

- Biz áli áskerı áreket ústindemiz, eger men qazir bul máselege qatysty qandaı da bir málimetterdi beretin bolsam, bul qarsylas úshin basymdyq bolady. Al biz qazirgi tańda qarsylasymyzǵa eshqandaı basymdyq bereıin dep otyrǵan joqpyz. Meniń bar aıtarym, biz aldyǵa qoıǵan maqsatymyzdy oryndadyq, bizdiń ushqyshtarymyzdyń barlyǵy elge aman oraldy,- dedi ÁÁK ókili.

Aıta keteıik, Úndistan men Pákistan arasyndaǵy qarym-qatynas 22 sáýir kúni Úndistannyń odaqtas Djammý men Kashmır aýmaǵyndaǵy Pahalgam qalasynda bolǵan teraktiden keıin shıelenisti. Terakt saldaryna 25 úndistandyq pen 4 nepaldyq mert boldy. 

7 mamyrdyń túninde Úndistannyń Áskerı áýe kúshteri «Sındýr» operatsııasyn bastap, terrorısterdiń Pákistandaǵy bazalaryna soqqy jasady.

Buǵan jaýap retinde Pákistan úkimeti «Banıan ýl-Marsýs» (qorǵasynmen qaptalǵan qorǵan) atty keń aýqymdy áskerı operatsııany bastady.