Úndistan Pákistannan taýar ákelýge jáne tranzıtke tyıym saldy

ASTANA. KAZINFORM – Úndistan Pákistanda óndirilgen nemese ol arqyly tranzıtpen jetkiziletin taýarlardy ımporttaýǵa tyıym saldy, dep habarlaıdy TASS aqparat agenttigi. 

Úndistan úkimetiniń Syrtqy saýda departamenti taratqan habarlamaǵa sáıkes, «Pákistannan shyqqan nemese odan eksporttalatyn barlyq taýardyń tikeleı nemese janama ımportyna nemese tranzıtine kelesi habarlama kelgenge deıin tyıym salynady». Atap ótilgendeı, «shekteý ulttyq qaýipsizdik pen memlekettik saıasat múddesi úshin engizildi».

Habarlama 22 sáýirde Djammý men Kashmırdegi tanymal týrıstik qala – Pahalgamda qarýly adamdar oq jaýdyrǵan lańkestik áreketten keıin Úndistan men Pákistan arasyndaǵy shıelenis kúsheıgen tusta jasaldy. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen. 

Lańkestik áreketten keıin Úndistan Islamabadtaǵy elshiligindegi adamdar sanyn eki esege derlik qysqartty, Pákistan dıplomatııalyq mıssııasynyń áskerı keńesshilerin persona non grata dep jarııalady jáne shekaradaǵy mańyzdy «Attarı» baqylaý beketin japty. Úndistan bıligi de Islamabadpen sýdy bólisý týraly kelisimdi jáne Pákistan azamattaryna vıza berýdi toqtatty.

Polıtsııanyń málimetinshe, shabýyl jasady degen tórt adamnyń úsheýi anyqtaldy: ekeýi Pákistan azamaty jáne bireýi Úndistan basqaratyn Kashmır azamaty. Tórtinshi týraly ázirge aqparat joq. Tiri qalǵandardyń kóbi sodyrlardyń úndilik azamattardy arnaıy nysanaǵa alǵanyn aıtady.

Shabýylǵa jaýapkershilik Pákistandaǵy «Lashkar-e-Taıba» uıymymen baılanysy bar Resistance Front dep atalatyn shaǵyn topqa júkteldi. Alaıda keıinirek ol óziniń shabýylǵa qatysy baryn joqqa shyǵaratyn málimdeme jasady.

Qazaqstandaǵy Pákistan Islam Respýblıkasynyń Tótenshe jáne ókiletti elshisi Naýman Bashır Bhattı elordada brıfıng ótkizip, Djammý men Kashmırdegi qazirgi ahýalǵa pikir bildirdi jáne óz eliniń resmı ustanymyn jetkizdi.