Úndistan Pákistanǵa soqqy jasady

ASTANA. KAZINFORM – Úndistan Kashmırdegi Pákistan baqylaýyndaǵy aımaqtarǵa soqqy jasaǵanyn málimdedi, dep habarlaıdy BBC.

Bul shabýyl Úndistan baqylaıtyn Kashmır bóliginde týrısterge jasalǵan shabýyldan keıin birneshe kún ótken soń oryn alǵan. Delı bul shabýylǵa qatysy bar sodyrlardy Pákistan qoldaıdy dep aıyptaǵan bolatyn.

— Úndi qarýly kúshteri «Sındýr» operatsııasyn bastap, Úndistanǵa qarsy lańkestik shabýyldar josparlanǵan ári baǵyttalǵan Pákistan men Pákistan basyp alǵan Djammý men Kashmırdegi lańkestik ınfraqurylymdarǵa soqqy jasady, — delingen resmı málimdemede.

Áleýmettik jelilerde úndistandyq telearnalarda arnaıy áskerı operatsııanyń bastalǵany týraly beınekórinister paıda boldy.

Úndi bıliginiń málimetinshe, operatsııa kezinde toǵyz nysana dál tıgen.

— Bizdiń áreketterimiz maqsatty, salmaqtalǵan jáne arandatýshylyq emes sıpatta boldy. Eshbir pákistandyq áskerı nysana shabýylǵa ushyraǵan joq. Úndistan nysanalar men shabýyl ádisterin tańdaýda aıtarlyqtaı ustamdylyq tanytty, — dedi resmı ókil.

Pákistan qarýly kúshteriniń ókili Islamabad bul shabýylǵa «qajetti ýaqytta jáne yńǵaıly jerde» jaýap beretinin málimdedi.

— Áýe kúshterimizdiń barlyq joıǵysh ushaqtary kókke kóterildi. Bul — Úndistan aýmaǵynan jasalǵan arsyz ári qorqaq shabýyl, — dedi ol.

Sońǵy kúnderi qos el shekarasynda atystar tirkeldi. Sarapshylar Úndistan 2019 jáne 2016 jyldardaǵy shabýyldardan keıingi jaǵdaı sııaqty jaýap beredi degen boljam aıtqan edi.

Úndistanda Pahalgamdaǵy terrorlyq shabýylǵa jaýap qaıtarý nusqalary qaraldy.

Úndistan Pahalgamdaǵy teraktiden keıin Pákistanǵa qarsy sharalar jarııalady.