Úndistan men Shvetsııa Venera ǵalamsharyna birlesken mıssııa ázirlep jatyr
ASTANA. KAZINFORM — Shvetsııa men Úndistan Venera ǵalamsharyna birlesken ǵarysh mıssııasyn daıyndap jatyr. Bul joba ǵalymdarǵa Kún júıesindegi eń úlken qupııalardyń birin — bir kezderi Jerge uqsas bolǵan Veneranyń qalaı tirshiliksiz planetaǵa aınalǵanyn túsinýge kómektesýi múmkin, dep habarlaıdy AZERTADJ.
ISRO 2028 jyly Venus Orbiter Mission atty pılotsyz mıssııany ushyrýdy josparlap otyr. Jobaǵa Kırýna qalasyndaǵy IRF zertteýshileri de qatysyp jatyr. Zond bortyna shved ǵalymdary ázirlegen Venusian Neutrals Analyzer ǵylymı qurylǵysy ornatylady.
Ǵalymdardyń pikirinshe, mıllıardtaǵan jyl buryn Venera betinde Jerdegideı muhıttar bolýy múmkin. Alaıda ýaqyt óte kele planeta barlyq sýynan aıyrylyp, atmosferasy Jer atmosferasynan shamamen 100 ese tyǵyz bolyp ketken. Jańa qurylǵy Venera atmosferasynyń ǵarysh keńistigimen jáne Kún jelimen ózara áreketin zertteıdi. Zertteýshiler bul eki planetanyń nege múlde bólek baǵytta damyǵanyn túsinýge múmkindik beredi dep úmittenedi.
Ǵarysh fızıkasy ınstıtýtynyń professory Stas Barabash aıtýynsha, Venerada sýdyń joıylyp ketýiniń sebepteriniń biri — planetada Jerdi kún radıatsııasynan qorǵaıtyn jeke magnıt órisiniń bolmaýy.
Shved ǵalymdary úshin bul Veneraǵa baǵyttalǵan alǵashqy mıssııa emes. Buǵan deıin IRF Eýropa ǵarysh agenttigi júzege asyrǵan Venus Express jobasyna qatysqan. Bul apparat 2006–2014 jyldary Venera orbıtasynda jumys istedi. Sol mıssııadan alynǵan derekter áli kúnge deıin ǵylymı zertteýlerde qoldanylyp keledi.
Buǵan deıin RǴA Medıko-bıologııalyq máseleler ınstıtýtynyń (IMBP) «Ǵaryshtyq bıologııa» ǵylymı baǵytynyń jetekshisi Vladımır Sychev Veneradaǵy jaǵdaılar adam ómiri úshin sonshalyqty qolaısyz, sondyqtan adamzattyń ol jaqqa pılottyq mıssııa jiberýi ekitalaı degen bolatyn.
