Úndistan men Pákistan shekarasynda atys boldy

ASTANA. KAZINFORM – Keshe túnde Pákistan áskeri Djammý men Kashmırdegi Pargaval sektoryndaǵy Úndistanmen shekarada oq jaýdyrdy, dep habarlaıdy NDTV. 

Atysty toqtatý rejımi Djammý aımaǵynyń úsh negizgi sektorynda da buzyldy.

Úndistan áskeri baqylaý syzyǵynda altynshy tún qatarynan sebepsiz atys bolǵanyn habarlady.

- Armııa ókilderiniń aıtýynsha, ásker barlyq ýchaskelerde tıimdi jaýap berdi, dep jazdy Úndistan BAQ. 

Premer-mınıstr Narendra Modı seısenbide keńes ótkizdi, oǵan eldiń Qorǵanys mınıstri Radjnat Sıngh, ulttyq qaýipsizdik jónindegi keńesshi Adjıt Doval jáne qarýly kúshterdiń barlyq úsh túriniń basshylary qatysty. 

Eske sala ketsek, 22 sáýir kúni qarýly adamdar Djammý men Kashmır odaǵy aýmaǵyndaǵy áıgili týrıstik qala – Pahalgamda terrorlyq shabýyl jasaǵan bolatyn. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen.

Keshe Úndistan men Pákistan shekarasynda taǵy da atys boldy.

Lańkestik áreketten keıin Úndistan Islamabadtaǵy elshiligindegi adamdar sanyn eki esege derlik qysqartty, Pákistan dıplomatııalyq mıssııasynyń áskerı keńesshilerin persona non grata dep jarııalady jáne shekaradaǵy mańyzdy «Attarı» baqylaý beketin japty. Úndistan bıligi sondaı-aq Islamabadpen sý resýrstaryn bólisý týraly kelisimdi jáne Pákistan azamattaryna vıza berýdi toqtatty.