Úndistan men Pákistan shekarasynda atys boldy

ASTANA. KAZINFORM – Úndistan men Pákistan armııasy Djammý men Kashmırdegi baqylaý syzyǵynda bir-birine oq jaýdyrdy. Bul týraly PTI agenttigi Úndistan áskerı qurylymyndaǵy derekkózge silteme jasap habarlady, dep jazady TASS.

– Baqylaý syzyǵynyń birneshe ýchaskesinde Pákistan tarapynan atys qarýyn qoldaný arqyly oq atyldy, – deıdi derekkóz. 

Úndiler de buǵan oq atýmen jaýap qaıtarǵan. Qaza tapqandar men jaralanǵandar týraly aqparat joq.

PTI agenttiginiń málimetinshe, bul atystar 22 sáýirde Pahalgam qalasynda bolǵan terrorlyq shabýyldan keıin Úndistan men Pákistan arasyndaǵy shıelenis kúsheıgen tusta bolyp otyr. Ol shabýylda 26 beıbit turǵyn qaza tapqan bolatyn.

Pahalgam qalasyndaǵy terakt

22 sáýir kúni qarýly adamdar Djammý men Kashmır odaǵy aýmaǵyndaǵy áıgili týrıstik qala – Pahalgamda terrorlyq shabýyl jasaǵan. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen.

Kóptegen adam jaralandy. Shabýyldy «Qarsylyq maıdany» atty top óz moınyna aldy. Bul toptyń Pákistanda tyıym salynǵan «Lashkar-ı-Taııba» uıymyna qatysy bar. Osy oqıǵadan keıin Úndistan Pákistanmen sý týraly kelisimdi toqtatyp, Nıý-Delıdegi pákistandyq keńesshilerdiń elden ketýin talap etti. Sondaı-aq pákistandyqtarǵa berilgen vızalar da joıyldy.

Aıta keteıik, Aqorda Memleket basshysynyń Úndistannyń Premer-mınıstrine kóńil aıtqanyn habarlady.

BUU Bas hatshysy Úndistandaǵy qarýly shabýyldy qatań aıyptady.

Úndistan basqaratyn Kashmırdegi tanymal týrıstik ortalyqta qarýly adamdar toby 26 adamdy óltirgennen keıin Úndistan Pákistanǵa qarsy sharalarǵa kóshti.

Djammý men Kashmır polıtsııasy Pahalgamda shabýyl jasaǵandardyń aty-jónin áshkerelep, olar týraly aqparat bergenderge syılyq jarııalady.