Úndistan men Pákistan aýmaǵyndaǵy Qazaqstan azamattary kóshirile me – mınıstrlik jaýaby

ASTANA. KAZINFORM – QR Syrtqy ister mınıstriniń birinshi orynbasary Aqan Rahmetýllın Úndistan men Pákistan aýmaǵyndaǵy Qazaqstan azamattaryn qaýipsiz jerge kóshirýge qatysty túsinik berdi.

Onyń aıtýynsha, Úndistan men Pákistan arasyndaǵy shıelenis taıaý arada sheshilýi múmkin.

— Osy qaqtyǵys tek beıbitshilik ári dıplomatııalyq tásildermen toqtaıdy dep úmittenemiz… Joıqyn soǵysqa barmaıdy dep oılaımyz, — dedi A. Rahmetýllın.

Sonymen qatar ol atalǵan eki eldiń aýmaǵynda júrgen Qazaqstan azamattaryna qatysty pikir aıtty.

— Osy elderdegi elshilikter bizdiń azamattarmen turaqty baılanysta… Qazir olardy jappaı kóshirýdiń qajettiligi joq. Eger qajet bolsa, biz aldyn ala eskertemiz. Islamabadtaǵy (Pákistan) jáne Nıý-Delıdege (Úndistan) elshilikter bul jaǵdaıdy táýlik boıy zerdelep otyr, ıaǵnı bizge ondaǵy ahýaldy baıandap jatyr. Bizdiń azamattardy evakýatsııalaýǵa eshqandaı sebep joq, — dedi QR Syrtqy ister mınıstriniń birinshi orynbasary.

Esterińizge sala keteıik, Pákistan Úndistannyń soqqylary beıbit aýyldar men meshitterge tıip, 26 adam qaza tapqanyn málimdedi. Kóz jumǵandar ishinde balalar da bar. Qazir qaza tapqandar sany 31 adamǵa jetti, al 57 adam jaraqat aldy.

Buǵan deıin Úndistan Pákistan baqylaýyndaǵy Djammý jáne Kashmır aımaqtaryna soqqy bergenin jáne bul aýmaqtarda Úndistanǵa qarsy lańkestik shabýyldar josparlanyp, basqarylǵan «terrorıstik ınfraqurylym» ornalasqanyn málimdegen edi. 

Úndistan Pahalgamdaǵy teraktiden keıin Pákistanǵa qarsy sharalar jarııalady. 

Aıta keteıik, 30 sáýirde Úndistan men Pákistan shekarasynda atys bolǵany týraly habarlaǵan edik. 

Úndistan men Pákistan soqqylaryn kúsheıte tústi. 

Jaqynda Pákistannyń qorǵanys mınıstri Havadja Muhammad Asıf Úndistan men Pákistan arasyndaǵy shıelenistiń artýy ıadrolyq soǵys qaýpin týdyryp otyrǵanyn málimdedi.