Úndistan men Nepalda sý tasqyny men kóshkinnen 70 adam qaza tapty
ASTANA. KAZINFORM — Úndistanda nóser jańbyr, sý tasqyny jáne kóshkin saldarynan 56 adam, Nepalda 14 adam qaza tapty. Nepalda taǵy 11 adam habar-osharsyz ketkender qatarynda, dep habarlaıdy Reuters.
Úndistannyń Ýttar-Pradesh shtatynda 25 qyrkúıekten 27 qyrkúıek tańyna deıin 66,5 mm jaýyn-shashyn túsken. Bul osy kezeńdegi qalypty kórsetkishten aıtarlyqtaı joǵary. Norma boıynsha bul aralyqta 7,6 mm jaýyn-shashyn túsýi tıis.
Qutqarý qyzmetteri sý basqan aýdandarda jumystaryn jalǵastyryp jatyr. Bılik gýmanıtarlyq kómek taratyp, aýyl sharýashylyǵyna keltirilgen shyǵyndy baǵalap jatyr.
Úndistanda qaza tapqan 56 adamnan bólek, 46 adam zardap shekti, myńnan astam úı zaqymdandy.
Nepal bıligi eldegi 77 okrýgtiń 49-ynda kenetten bolatyn sý tasqyny qaýpi bar ekenin eskertti. Olardyń jartysynan astamynda iri ózender men olardyń salalaryndaǵy sý deńgeıiniń kóterilýine baılanysty sý tasqyny men sel qaýpi joǵary bolyp otyr.
Nepaldyń birqatar aýdanynda elektrmen qamtý júıesi tolyǵymen buzyldy. Rahýganga ózenindegi sý tasqyny qýaty 40 MVt bolatyn gıdroelektr stantsııasynyń ınfraqurylymyna jáne elektr berý jelileriniń tirekterine de zaqym keltirdi.
Úndistanda Ortalyq sý komıssııasy jeti shtattaǵy 30 gıdrologııalyq bekette jaǵdaı kúrdeli ekenin habarlady. Gang, Gandak, Kosı, Bagmatı jáne Narmada ózenderin qosa alǵanda, birneshe iri ózendegi sý deńgeıi qaýipti mejeden asty.
Sý tasqyny men kóshkin Nepaldyń keıbir aýdandaryndaǵy telekommýnıkatsııa jumysyna da kedergi keltirdi. Buǵan talshyqty-optıkalyq jelilerdiń zaqymdanýy jáne elektr energııasynyń úzilýi sebep boldy.
Budan bólek, Nepaldyń soltústigindegi Manang okrýginde bıiktigi 7126 metr Hımlýng-Hımal taýynyń mańyndaǵy bazalyq lagerdi qar kóshkini basyp qalǵannan keıin jergilikti on jumysshy habar-osharsyz ketti.
Eske salaıyq, Nepalda 26 tamyzda bolǵan joıqyn sý tasqynynan qaza tapqandarǵa baılanysty 7 qyrkúıek Ulttyq aza tutý kúni dep jarııalanǵan edi. Memlekettik mekemelerde týlar tómen túsirilip, qaza bolǵandardyń otbasylary dástúrli aza tutý rásimderin ótkizdi. Nepaldaǵy sý tasqynynan qaza tapqandar sany 1,4 myń adamnan asty.
