Úndistan men Nepalda nóser jaýynnan 90-nan astam adam qaza tapty

ASTANA. KAZINFORM — Meteorologııalyq qyzmet óńirde aldaǵy ýaqytta áli de tolassyz jaýyn-shashyn bolady dep boljap otyr, dep habarlaıdy Reuters.

 — Sársenbiden beri Úndistan men Nepaldyń keı jerlerinde toqtaýsyz jaýǵan jańbyr saldarynan 90-nan astam adam kóz jumdy, - dep habarlady jergilikti bılik.

Bıhar shtatynyń shyǵysyndaǵy aýa raıyna baılanysty tabıǵı apattan 64 adam mert boldy. Bul týraly Reuters agenttigine tótenshe jaǵdaılar basqarmasynyń resmı ókili aqparat taratty. 

Jergilikti basylymdar Úndistannyń eń kóp halyq qonystanǵan Ýttar-Pradesh shtatynda 20-dan astam adamnyń qaza tapqanyn jarysa jazýda. Al Tabıǵı apattardy basqarý ulttyq basqarmasy Nepalda naızaǵaı túsken jáne nóser jańbyrdan zardap shekken kem degende 8 adam ajal qushqanyn málimdegen. 

Úndistannyń meteorologııalyq departamentiniń deregine súıensek, senbige deıin eldiń ortalyq jáne shyǵys bóliginde kún kúrkirep, naızaǵaı oınap, ekpindi jel soǵady. 

Buǵan deıin AQSh-ta tolassyz jaýǵan jańbyr Kentýkkı shtatynda ózen deńgeıiniń kúrt kóterilýine sebep bolǵan. AQSh-ta daýyldan qaza tapqandar sany 23-ke jetti.