Úndistan men Qytaı arasyndaǵy áýe reısteri bes jyl úzilisten keıin qaıta jandandy
ASTANA. KAZINFORM — Úndistan jeksenbi keshinde materıktik Qytaımen tikeleı áýe reısterin qaıta bastady. Bul reıster shamamen bes jyl buryn toqtatylǵan bolatyn, dep habarlaıdy Sınhýa.
IndiGo áýe kompanııasynyń alǵashqy ushaǵy bortynda 176 jolaýshymen birge Kalkýttadaǵy Netadjı Sýbhas Chandra Bos atyndaǵy halyqaralyq áýejaıdan ushyp shyǵyp, Qytaıdyń ońtústigindegi Gýanchjoý qalasyna qondy.
IndiGo kompanııasynyń bas atqarýshy dırektory Pıter Elberstiń aıtýynsha, tikeleı áýe qatynasynyń qaıta jandanýy eki el arasyndaǵy saparlardy jeńildetip, saýda aınalymyn arttyryp, ekonomıkalyq baılanystardy nyǵaıtýǵa múmkindik beredi.
Úndistan men materıktik Qytaı arasyndaǵy tikeleı áýe reısteri 2020 jyldyń basyna deıin oryndalyp kelgen, biraq keıin COVID-19 pandemııasyna baılanysty toqtatylǵan.
Eske sala ketsek, 9 qazanda Qytaı Syrtqy ister mınıstrliginiń resmı ókili Go Tszıakýn eki el arasyndaǵy tikeleı áýe qatynasty qaıta jandandyrýǵa daıyndyq júrip jatqanyn habarlaǵan bolatyn.
Aıta ketelik 15 qazan kúni ІІ Astana Think Tank Forum-2025 halyqaralyq forýmynyń paneldik sessııasynda sóz sóılegen Úndistandaǵy Ǵalamdyq zertteýler ınstıtýtynyń prezıdenti Ashok Sadjanhar Úndistan men Qytaı shekarasyndaǵy turaqtylyq jahandyq ekonomıkaǵa áser etetin mańyzǵa ıe ekenin atap ótti.