Úndistan men Qazaqstan jasandy ıntellekt arqyly ınklıýzıvti ósimdi kúsheıtpek
ASTANA. KAZINFORM – 2026 jylǵy 19-20 aqpanda Nıý-Delıde «Sarvajan Hitaya, Sarvajan Sukhaya – Barshaǵa ıgilik, barshaǵa baqyt» taqyrybymen Jasandy ıntellekt sammıti ótedi. Atalǵan alań tehnologııany etıkalyq, ınklıýzıvti ári adam ıgiligine baǵyttalǵan qaǵıdattar negizinde damytý máselesine arnalmaq.
Úndistannyń Qazaqstandaǵy Elshisi ıA.K. Saılas Tangaldyń aıtýynsha, jasandy ıntellekt búgingi tańda jahandyq damýdyń aıqyndaýshy faktorlarynyń birine aınalyp keledi.
«Jasandy ıntellekt – túpki maqsat emes, ol adam múmkindigin keńeıtetin qýatty qural. Durys ári jaýapty basqarylǵan jaǵdaıda AI ekonomıkalardy jańǵyrtýǵa, memlekettik basqarý sapasyn arttyrýǵa jáne kúrdeli damý máselelerin sheshýge eleýli serpin bere alady. Densaýlyq saqtaý salasynda ol sapaly dıagnostıka men dál emdeýge qoljetimdilikti arttyrady, bilim berý júıesinde oqý úderisin barshaǵa ashyp, jańa daǵdylardy meńgerýge múmkindik beredi. Al memlekettik basqarýda ashyqtyqty kúsheıtip, qyzmet kórsetý tıimdiligin arttyryp, sheshim qabyldaý sapasyn jaqsartady», – dedi elshi.
Onyń sózinshe, JI-ge negizdelgen ınnovatsııalar klımattyń ózgerýimen kúresýge, energııa tıimdiligin arttyrýǵa, aýyl sharýashylyǵyn jańǵyrtýǵa jáne «aqyldy» ınfraqurylym qalyptastyrýǵa jol ashady.
«Tehnologııany adam ıgiliginiń ózegine qoıý – bizdiń ortaq strategııalyq ustanymymyz. Úndistan men Qazaqstan osy baǵytta seriktestigin mazmundy ári nátıjeli deńgeıge kótere alady», – dedi ıA.K. Saılas Tangal.
Elshi eki eldiń jasandy ıntellekt salasyndaǵy yntymaqtastyǵy bilim berý, ǵylymı zertteý, densaýlyq saqtaý jáne ınnovatsııa baǵyttaryn qamtıtynyn atap ótti. Onyń aıtýynsha, Qazaqstan joǵary oqý oryndaryna JI pánderin engizý arqyly kelesi býyndy tsıfrlyq bolashaqqa daıyndaýda mańyzdy qadam jasady.
Al Úndistannyń ǵylymı-zertteý áleýeti men kadr daıarlaý tájirıbesi bul bastamalardy tabıǵı túrde tolyqtyra alady.
«Biz kadr daıarlaý, bilim almasý jáne birlesken zertteýler arqyly uzaqmerzimdi ınstıtýtsıonaldyq baılanystardy nyǵaıta alamyz. Densaýlyq saqtaý salasyndaǵy yntymaqtastyq, sonyń ishinde jasandy ıntellektke negizdelgen medıtsınalyq tehnologııalar, azamattarǵa tikeleı paıda ákeletin naqty nátıjeler kórsetip otyr. Bul – tehnologııalyq progress pen kásibı áriptestiktiń tıimdi úılesiminiń aıqyn dáleli», – dedi elshi.
Onyń pikirinshe, Úndistan-Qazaqstan seriktestigi tek ekijaqty formatpen shektelmeı, óńirlik jáne jahandyq deńgeıde de mańyzǵa ıe.
«Biz ınklıýzıvti damý men tehnologııalardy jaýapty basqarýdy qoldaımyz. Kúsh-jigerdi úılestirý arqyly adamǵa baǵdarlanǵan ınnovatsııany, ádil qoljetimdilikti jáne etıkalyq jaýapkershilikti basymdyq etetin jahandyq normalardy qalyptastyrýǵa úles qosa alamyz», – dep túıindedi ıA.K. Saılas Tangal.
Aıta keteıik, Qazaqstan men Úndistan krımınalıstıka jáne tsıfrlyq tergeý boıynsha birlesken baǵdarlama ázirleıdi.
