Úndistanda altyn qorynyń úlesi kúrt artty
ASTANA. KAZINFORM — Úndistan geosaıası táýekelderdiń joǵarylaýyna baılanysty óziniń altyn qoryn sheteldegi saqtaý qoımalarynan qaıtarý protsesin jedeldetti. Bul týraly Report agenttigi jazdy.
Aqparatqa sáıkes, 2023 jyly Úndistan eldegi altyn qorynyń shamamen 38 paıyzyna ıe boldy. 2026 jyldyń naýryzynda bul kórsetkish shamamen 77%-ǵa deıin ósti.
Úndi ekonomısteriniń pikirinshe, bul saıasat birneshe faktorǵa baılanysty. Olardyń qatarynda sheteldik aktıvterge tyıym salý qaýpi, sondaı-aq Taıaý Shyǵystaǵy qaqtyǵystyń órshýi de bar. Osynyń aıasynda Úndistan bıligi ekonomıkalyq qaýipsizdikti nyǵaıtýǵa jáne syrtqy saqtaý oryndaryna táýeldilikti azaıtýǵa umtylyp otyr.
Onyń ústine Úndistannyń ózinde altynǵa degen qyzyǵýshylyq artyp keledi. Dúnıejúzilik altyn keńesiniń málimeti boıynsha elde altyn tutyný kórsetkishi qańtardan naýryzǵa deıin 10,2 paıyzǵa ósip, 151 metrıkalyq tonna boldy.
Investıtsııalyq suranys ta aıtarlyqtaı ósti, úndi kompanııalarynyń altynǵa salǵan ınvestıtsııasy bir jylda 52% ósip, 82 tonnaǵa jetti.
Sarapshylar úndi ınvestorlarynyń altynǵa degen qyzyǵýshylyǵy odan ári jalǵasady dep boljap otyr.
Osyǵan deıin Úndistan premer-mınıstri Narendra Modı azamattardy shyǵyndy azaıtyp, kúndelikti ádetterin ózgertýge shaqyrǵany týraly jazǵan bolatynbyz.
Eske salaıyq, Eýropanyń ortalyq bankteri altyn qoryn AQSh-tan áketip jatyr.
