Úndistan bıligi Meta kompanııasyna eskertý joldady
ASTANA. KAZINFORM — Úndistannyń Elektronıka jáne aqparattyq tehnologııalar mınıstrligi Instagram ıesi — Meta kompanııasyna balalardy jynystyq turǵydan qanaýǵa «ıtermeleıdi» delingen aqyly jarnamalardy alyp tastaýdy talap etetin habarlama joldady. Bul týraly Anadoly agenttigi habarlady.
Úndistannyń NDTV jańalyqtar arnasynyń habarlaýynsha, mınıstrliktiń aty-jóni atalmaǵan ókili osy máselege qatysty málimdeme jasady.
Resmı ókil mınıstrliktiń Instagram áleýmettik jelisindegi aqyly jarnamalarda balalardy qanaýǵa qatysty mazmunnyń paıda bolýyna baılanysty Meta kompanııasyna habarlama jibergenin málimdedi.
Habarlamaǵa sáıkes, mınıstrlik Meta kompanııasynan balalardy qanaýǵa qatysty materıaldardy qamtıtyn Instagram jarnamalaryn alyp tastaýdy jáne 7 kún ishinde egjeı-tegjeıli jaýap berýdi talap etti.
Meta ókili BBC-ge bergen pikirinde kompanııanyń balalardy jynystyq qanaýǵa jáne olarǵa qatysty zorlyq-zombylyq materıaldaryn taratýǵa «múlde tózbeıtinin» aıtty.
Kompanııa ókiliniń sózinshe, kontent pen jeke derekterge qatysty zańbuzýshylyqtar jasandy ıntellektiniń ozyq tehnologııalary arqyly anyqtalady. Sondaı-aq Meta «3,5 mıllıard paıdalanýshynyń arasynda jasyrynǵan qylmyskerlermen kúresip jatqanyn» málimdedi.
Úndistanda 2012 jyly qabyldanǵan zańdarǵa sáıkes, eger Meta bul iske qatysty suralǵan aqparatty usynbasa, oǵan qarsy sot isi bastalýy múmkin.
BBC júrgizgen zertteý barysynda Instagram Úndistanda balalardy jynystyq qanaýǵa «yntalandyratyn» aqyly jarnamalardy jarııalaǵany anyqtaldy.
Aıta keteıik, Úndistanda NEET-UG 2026 emtıhanyn qaıta tapsyrýǵa baılanysty Telegram jumysyna shekteý qoıyldy.
