Úndistan aýrýhanasynda bir kúnde 12 sábı men 12 eresek kóz jumdy

Úndistannyń Maharashtra shtatyndaǵy aýrýhanada bir kúnde 12 sábı kóz jumdy. Seısenbi kúni oppozıtsııalyq saıasatkerler aımaqtyq bılik pen aýrýhana basshylyǵyn óreskel buzýshylyq jasady dep aıyptady. QazAqparat bul týraly Reuters-ke silteme jasap habarlaıdy. 

Jergilikti BAQ-tyń habarlaýynsha, sol jeksenbide Úndistannyń iri megapolısi Mýmbaıdan shamamen 600 km (373 mıl) qashyqtyqta ornalasqan Nanded aýdanyndaǵy Shankarrao Chavan aýrýhanasynda qant dıabeti, baýyr jáne búırek jetkiliksizdigi sııaqty ártúrli dıagnozben aýyrǵan birden 12 eresek adam qaıtys boldy.

Týystarynyń aıtýynsha, jeksenbi kúni aýrýhananyń náresteler bólimshesi tolyp ketti, al bir jańa týǵan náresteni kútýge arnalǵan ınkýbatorǵa birden tórt-bes náreste jatqyzylǵan. 

Aýrýhana ókilderiniń aıtýynsha, dári-dármek pen dárigerler tapshylyǵy bolǵan joq.

Naýqastarǵa tıisti kútim kórsetildi, biraq olarǵa em qonbaı, qaıtys bolǵan. 

Seısenbi kúni Maharashtra úkimeti náresteler men eresek patsıentterdiń ólimine qatysty tergeý bastalǵanyn habarlady. 

— Jıyrma tórt ólim — bul óte kóp. Nelikten bir kúnde sonsha adam qaıtys boldy? Bul dári-dármektiń jetispeýshiliginen be, kadr tapshylyǵynan ba, álde basqa sebepteri bar ma — bárin anyqtaımyz», — dedi tilshilerge memlekettik mınıstr Gırısh Mahadjan.

Jeksenbi kúni habarlanǵan jappaı kisi ólimi — Maharashtrada sońǵy birneshe aıda bolǵan ekinshi oqıǵa. Tamyzda Tane aýdanyndaǵy memlekettik aýrýhanaǵa túsken 18 adam 24 saǵat ishinde qaıtys boldy, dep habarlady jergilikti BAQ.

Shtat úkimeti oqıǵaǵa qatysty tergeý júrgizýdi tapsyrdy.