Úndistan áskeri Somalı jaǵalaýynda qaraqshylar basyp alǵan kemeden 20 teńizshini qutqardy
ASTANA. KAZINFORM — Úndistannyń áskerı-teńiz kúshteri arnaıy jasaqpen birlesip, Somalıdiń soltústik-shyǵys jaǵalaýyna jaqyn Arab teńizinde qaraqshylar basyp alǵan balyq aýlaý kemesiniń 20 ekıpaj múshesin bosatty. Bul týraly Kazinform agenttigi TASS-qa silteme jasap habarlady.
ANI agenttiginiń málimetinshe, qutqarý operatsııasy eki táýlikten astam ýaqytqa sozylǵan. Oǵan Úndistannyń áskerı-teńiz kúshteriniń kemesi, barlaý ushaǵy jáne arnaıy jasaq bólimshesi qatysqan.
Arnaıy jasaq sarbazdary C-17 áskerı-kólik ushaǵynan qaraqshylar basyp alǵan «Azını» traýlerine desant túsirgen. Nátıjesinde ekıpajdyń 20 múshesiniń barlyǵy qutqaryldy. Operatsııa barysynda balyqshylar men Úndistan áskerı qyzmetshileriniń eshqaısysy zardap shekken joq.
Qolda bar málimetke qaraǵanda, qaraqshylar kemeni qazan aıynda basyp alyp, ony saýda kemelerine shabýyl jasaý úshin júzbeli baza retinde paıdalanýdy kózdegen.
Úndistannyń qorǵanys mınıstri Radjnath Sıngh áskerı-teńiz jáne áýe kúshteri birlesip júrgizgen operatsııanyń sátti aıaqtalýy eldiń Úndi muhıtyndaǵy kommertsııalyq keme qatynasynyń qaýipsizdigi men erkindigin qamtamasyz etýge beıildi ekenin kórsetkenin málimdedi.
Buǵan deıin álemde tirkelgen qaraqshylyq jáne kemelerge qarýly shabýyl jasaý oqıǵalarynyń sany 17%-ǵa artqany aıtylǵan. 2024 jyly 146 oqıǵa tirkelse, 2025 jyly bul kórsetkish 171-ge jetken. Halyqaralyq teńiz uıymynyń málimetinshe, Somalı jaǵalaýy men Aden shyǵanaǵynda saýda kemelerine shabýyl jasaý qaýpi áli de saqtalyp otyr.
Eske salaıyq, buǵan deıin Kıpr jaǵalaýynda keme sýǵa batyp, 10 teńizshi qutqarylǵanyn habarlaǵanbyz.
