Úndistan alǵash ret jeke kompanııa ázirlegen Vikram-1 zymyranyn ushyrdy
ASTANA. KAZINFORM – Úndistannyń Skyroot Aerospace jeke kompanııasy alǵash ret Vikram-1 zymyran-tasyǵyshyn ǵaryshqa ushyrdy. Ushyrylym 18 shildede Shrıharıkota aralyndaǵy Satısh Dhavan atyndaǵy ǵarysh aılaǵynan júzege asyryldy, dep habarlaıdy DW.
Bıiktigi shamamen 22 metr bolatyn zymyran tómen Jer orbıtasyna 350 kelige deıingi paıdaly júkti shyǵarýǵa arnalǵan.
Kompanııanyń málimetinshe, Vikram-1 orbıtaǵa úndistandyq jáne sheteldik tapsyrys berýshilerdiń birneshe tájirıbelik júgin jetkizedi. Olardyń qatarynda zerthanada ósirilgen almas pen ǵarysh qoqysyn joıýǵa arnalǵan robottandyrylǵan manıpýlıatorlar bar.
– Mıssııanyń basty maqsaty – zymyrannyń qozǵaltqysh júıesin, avıonıkasyn, telemetrııasyn jáne ushý kezindegi baǵyttaý júıelerin synaqtan ótkizý, sondaı-aq bolashaq kommertsııalyq ushyrýlar úshin mańyzdy derekterdi jınaý, – dep málimdedi Skyroot Aerospace.
Úndistan premer-mınıstri Narendra Modı bul oqıǵany «eldiń ǵaryshty ıgerý jolyndaǵy mańyzdy kezeń» dep atady.
DW málimetinshe, Úndistan 2020 jyly ǵarysh salasyn jeke ınvestıtsııalar úshin ashyp, startaptarǵa zymyrandar men spýtnıkter ázirleýge, sondaı-aq ǵarysh apparattaryn ushyrýǵa múmkindik bergen. Buǵan deıin bul jumystardy tek Úndistannyń ǵaryshtyq zertteýler uıymy (ISRO) júzege asyratyn.
2022 jyly Skyroot Aerospace kompanııasynyń yqsham Vikram-S zymyrany alǵashqy sýborbıtalyq ushýyn sátti oryndaǵan bolatyn. Al 2023 jyldyń tamyzynda Úndistan «Chandraıan-3» avtomatty stantsııasyn Aıdyń ońtústik polıýsi mańyna sátti qondyryp, mundaı jetistikke jetken álemdegi sanaýly elderdiń qataryna qosyldy.
Úkimettiń IN-SPACe agenttiginiń dereginshe, Úndistan 2033 jylǵa qaraı jahandyq ǵarysh ekonomıkasyndaǵy úlesin qazirgi 2 paıyzdan bes esege arttyryp, salanyń kólemin 44 mıllıard AQSh dollaryna jetkizýdi josparlap otyr.
Aıta keteıik, adamzat tarıhyndaǵy eń úlken zymyran Starship synaq ushyrylymyn ótkizdi.
