Úndistan 25 tamyzdan bastap AQSh-qa poshta jóneltýdi ýaqytsha toqtatady

ASTANA. KAZINFORM — Úndistan poshta qyzmeti senbi kúni 25 tamyzdan bastap AQSh-qa barlyq poshta jóneltilimderin ýaqytsha toqtatatynyn jarııalady, dep jazady Sınhýa.

Bul sheshim osy aıdyń sońynda kúshine enetin AQSh-tyń keden erejelerine engizilgen ózgeristerge baılanysty qabyldanǵan.

AQSh úkimeti buǵan deıin «de minimis» dep atalatyn keden erejesin joıǵan bolatyn. Bul ereje sheńberinde quny 800 AQSh dollaryna deıingi sálemdemeler elge kedendik baj salyǵynsyz kirgizile beretin.

Úndistan tarapynyń naqtylaýynsha, jańa talap boıynsha halyqaralyq poshta jelisi arqyly jóneltilimderdi jetkizetin tasymaldaýshylar nemese AQSh Kedendik jáne shekara qyzmeti (CBP) bekitken basqa da «ýákiletti taraptar» sálemdemelerge baj salyǵyn eseptep, jınaýǵa mindetti bolady.

CBP 15 tamyzda keıbir nusqaýlyqtardy jarııalaǵanymen, ýákiletti taraptardy anyqtaý jáne baj salyǵyn jınaý men aýdarý tetikteri áli naqty aıqyndalmaǵan. Osyǵan baılanysty AQSh-qa jetkizý qyzmetin júzege asyratyn áýe tasymaldaýshylary 25 tamyzdan keıin poshta jóneltilimderin qabyldaı almaıtyndaryn málimdedi. Olar muny operatsııalyq jáne tehnıkalyq daıyndyqtyń jetkiliksizdigimen túsindirdi.

Osy jaıttardy eskere otyryp, Úndistannyń poshta departamenti 25 tamyzdan bastap AQSh-qa baǵyttalǵan barlyq poshta jóneltilimderiniń tirkelýin ýaqytsha toqtatý týraly sheshim qabyldady. Alaıda, hattar, qujattar jáne quny 100 AQSh dollaryna deıingi syılyqtar sııaqty keıbir sanattaǵy jóneltilimder bul shekteýden tys qalyp, olardy qabyldaý jáne jóneltý jalǵasa beredi. Bul — AQSh tarapynan qosymsha túsiniktemeler berilgenge deıingi ýaqytsha shara.

Budan buryn AQSh prezıdenti Donald Tramp dúısenbi kúni poshta arqyly daýys berý júıesine qarsy shyqty jáne bul tájirıbeden bas tartý úshin «qozǵalysqa bastamashy» bolatynyn málimdedi.