Úndistannyń soltústiginde sýyqtan 30-dan astam adam kóz jumdy
ASTANA. QazAqparat - Úndistannyń soltústigindegi Ýttar-Pradesh shtatynda jalpy normadan aýytqyǵan sýyq adamdardyń ómirin qıdy.
Sońǵy eki kúnde onda 31 adam qaıtys bolǵan. Sonyń segizi eldiń shyǵysynda, 23-i batysta qaıtys boldy, onda temperatýra rekordtyq tómen belgilerge deıin túsip, nebári 2,5 gradýs jylylyqty kórsetken. Ádette jeltoqsan aıynda mundaǵy aýa temperatýrasy 8-9 gradýs jyly bolady.
Sheteldik BAQ-tyń habarlaýynsha, sýyqtyń túsýi Úndistan turǵyndarynyń ómirlerine qaýip tóndirýde, óıtkeni kóptegen adamdardyń jyly kıimi joq jáne olar dalada qonýda, al úılerinde ot jaǵylmaıdy.
Delıde de bir adam sýyqtan kóz jumdy, al úılerinde jylyný úshin ot jaqqan taǵy úsh adam tútinge tunshyǵyp qalǵan. Kólik apattarynyń jáne sonyń saldarynan zardap shekken adamdardyń sany da kóbeıdi. 22 jeltoqsandaǵy aqparat boıynsha, Delı áýejaıynda tuman saldarynan 50 reıs toqtatylǵan.
Kún raıynyń salqyndaýyna baılanysty 28 jeltoqsanǵa deıin shtattaǵy barlyq mektepter jabyldy. Al qalyń tuman saldarynan 200 poıyzdyń qozǵalysy toqtatylǵan. Meteorologtardyń boljamy boıynsha, eldiń soltústik jáne ortalyq aýdandarynda kem degende úsh kún sýyq kún raıy saqtalyp, tuman bolady.
