Úndistannyń shyǵysyndaǵy sý tasqynynda 156 adam mert boldy, 1,4 mln.-ǵa jýyq adam zardap shekti
ASTANA. QazAqparat - Úndistannyń shyǵysyndaǵy Bıhar shtatyndaǵy sý tasqyny qurbandarynyń sany 156 adamǵa jetti, 1,4 mln.-ǵa jýyq jergilikti turǵyndar múlikterinen jáne úı-jaıynan aıyryldy. Bul týraly TASS Tabıǵat apaty saldaryn joıý jónindegi ulttyq basqarmaǵa silteme jasap habarlady.
Basqarmanyń málimetterinshe, «ótken táýlik ishinde ǵana úsh azamat kóz jumǵan, sońǵy eki aptanyń ishinde keminde 156 adam sý tasqynynyń qurbany boldy». Tabıǵat apatynan Bıhardyń 12 okrýginiń 2024 eldi mekeninde barlyǵy 1,4 mln.-ǵa jýyq adam zardap shekti. Tasqyn sondaı-aq 8 mln.-ǵa jýyq gektar aýyl sharýashylyǵy jerlerin basty, joldardy shaıyp ketti, ondaǵan kópirler búlindi nemese tolyǵymen qırady.
Qutqarýshylardyń jalpy sany 556 myń adamdy qaıyqtarmen qaýipti jerlerden kóshirýine týra keldi, 598 ýaqytsha turatyn lagerlerge olardyń 303 myńy ornalasty, qalǵandary týystary men dostaryn panalady.
Bıhardaǵy aýqymdy sý tasqyny mýssondyq nóser jaýyn-shashynnyń saldarynan shtat aýmaǵy arqyly ótetin alty iri ózenderdiń, sonyń ishinde, Ganga ózeniniń sý deńgeıi artýy saldarynan boldy.
