Úndistannyń kadetteri Taraz ýnıversıtetindegi áskerı kafedranyń jumysymen tanysty

TARAZ. QazAqparat - Ózara yntymaqtastyq jónindegi memorandým boıynsha M.Dýlatı atyndaǵy TarMÝ-ǵa Úndistan ulttyq kadetter (ÚUK) korpýsynan delegatsııa keldi. Bul týraly ýnıversıtettiń baspasóz qyzmeti habarlady.

Úndistandyq kadetter azamattyq mamandyqpen qatar áskerı sala mamandaryn daıarlaıtyn áskerı kafedranyń jumysymen tanysty. Úndistannan kelgen áskerı delegatsııa aldymen ýnıversıtet rektory Mahmetǵalı Sarybekovtyń qabyldaýynda boldy.

Kezdesý barysynda sóz alǵan ýnıversıtet basshy Mahmetǵalı Nurǵalıuly Úndistan men Qazaqstan arasyndaǵy áriptestik baılanystyń tamyry tym tereńde jatqandyǵyn atap ótti.
«Birinshiden, Taraz memlekettik ýnıversıteti Muhammed Haıdar Dýlatıdyń esimin ıelengen. Al, orta ǵasyrdaǵy Ortalyq Azııa tarıhynyń shejireshisi Dýlatı esimi úndistandyqtar úshin de tańsyq emes. Ol kisi Úndistandaǵy Kashmır ólkesin 11 jyl basqarǵan. Uly babamyzǵa topyraq ta sol Kashmır jerinen buıyrǵan. Sondyqtan, úndi áskerıleriniń delagatsııasynyń TarMÝ-ǵa taban tireýi beker emes. Ekinshiden, Taraz Uly Jibek jolynyń boıyndaǵy ejelgi qala. Demek, bul qala ortasyrdaǵy órkenıetter toǵysqan ortalyqqa aınaldy deýge bolady. Biz búgin sol tarıhı sabaqtastyqtyń áskerı sala mamandaryn daıarlaýdaǵy áriptestikke ulasqandyǵynyń kýási bolyp otyrmyz», - dedi Mahmetǵalı Nurǵalıuly.
Odan soń, Tarazǵa ÚUK-nyń 12 kadetin bastap kelgen polkovnık Kırpal Sıng delegatsııany kútip alýda qonaqjaılyq kórsetken ýnıversıtet basshylyǵyna alǵysyn jetkizdi. Óz kezeginde, úndistandyq kadetteri de elimizdegi áskerı sala mamandaryn daıarlaý máselelerine qatysty suraqtaryn qoıyp, naqty jaýaptaryn aldy. Kezdesý barysynda úndistandyq delegatsııa qazaqstandyq joǵary oqý oryndarymen azamattyq sala mamandaryn daıarlaý isinde de baılanys ornatýǵa nıetti ekendikterin jetkizdi.
Ótken jyly qol qoıylǵan áriptestik týraly memorandýmǵa saı elimizdegi áskerı kafedralarynda Úndistanmen áskerı sala mamandaryn daıarlaý isinde qarym-qatynas jandanyp keledi. Atalǵan memorandým negizinde TarMÝ áskerı kafedrasynyń stýdentteri de 2 ret ÚUK korpýsynda bolyp keldi. Atap aıtqanda, ótken jyldyń 21 qarasha - 4 jeltoqsan aralyǵynda áskerı kafedra basshysy, polkovnık Saǵat Muqushevtiń jetekshilik etken delegatsııa «Safarı shólderi-2015» áskerı oqý-jattyǵý jıynyna qatysyp qaıtty. Al, bıylǵy jyldyń 14 - 29 qańtar aralyǵynda ÚUK korpýsyna attanǵan qazaqstandyq delegatsııa quramynda eki stýdent bardy.

Úndistandyq áskerıler delegatsııasy Tarazdyń kórikti jerlerimen tanysyp, ejelgi keshen - Aqyrtas saraıynyń ornynda boldy.