Úndistannyń dáýletti kásipkeriniń biri monastyrǵa ketti
ASTANA. QazAqparat - Úndistandyq kásipker Banvarlal Doshı djaınısterdiń monastyrlyq ordenine qosylyp, búkil baılyǵynan bas tartty. Forbes onyń dáýletin 600 mln. dollarǵa baǵalady - mundaı soma Doshıdiń Úndistannyń eń baı adamdarynyń qataryna qosylýyna múmkindik berdi.
Doshı - plastıka óndirisimen aınalysatyn DR International kompanııasynyń qojaıyny. Magnat óziniń qarajatynyń edáýir bóligin djaınıstik uıymdarǵa qaıyrymdylyqqa berýge sheshim qabyldady. 31 mamyrda ony monah qataryna qabyldaý rásimi ótti. Oǵan 150 myńnan astam adam qatysty.
Rásim pilder, jylqylar, túıeler, mýzykanttar, bıshiler men monahtar qatysqan sherýmen bastaldy. Djaınıster ózderiniń ǵuryptyq saltyn oryndady, onyń barysynda Doshı shashyn taqyrlap aldyryp tastady.
Kásipker óziniń barlyq jyljymaıtyn múliginen bas tartýy tıis. Ol uıaly telefondardy da paıdalanbaıtyn bolady jáne tek qana aq kıim kıip júredi. Doshı kún saıyn tańǵy saǵat tórtte turyp, birneshe saǵat ıogamen jáne medıtatsııamen aınalysady. Sonymen birge ol tiri maqulyqtarǵa, sonyń ishinde jándikterge de zalal keltirmeýi úshin árqashan da jalańaıaq júretin bolady.
Doshıdiń otbasy onyń bar ómirin monastyrǵa arnaýyna qarsy boldy. Kásipkerdiń uly ákesiniń bul jolǵa túsýge úsh jyl boıy ázirlengenin aıtty. Djaınızm búkil tiri jándikke zııan tıgizbeýge úndeıdi. Din asketızmge úlken mańyz beredi. Djaınıster ordeniniń músheleri nekeden bas tartady.
Budan buryn 29 mamyrda dıaspora jónindegi grýzın mınıstri Gela Dýmbadze bir aptaǵa monastyrǵa ketetinin jarııalady. «Men premer-mınıstrden demalys berýin suradym, sol kúnderdi monastyrda ótkizgim keledi», - dedi sheneýnik. Biraq ta, ol mınıstrlik qyzmetinin bas tartpaıtynyn naqtylady, dep jazady RBK.
