Úndistannyń aýyldyq aýdandardy damytý mınıstri ant qabyldaǵannan keıingi 8-shi kúni qaza tapty
ASTANA. QazAqparat - Úndistannyń aýyldyq aýdandardy damytý, aýyz sý jáne sanıtarııa mınıstri Gopınathrao Mýnde el astanasy Nıý-Delıde jol apatynan qaza tapty. Bul jaıynda jýrnalısterge Úndistannyń jol kóligi, avtomobıl joldary jáne júk tasymaldaý mınıstri Nıtın Gadkarı málim etti, dep habarlady ITAR-TASS.
Jol apaty jergilikti ýaqyt boıynsha saǵat 06:30-da oryn alǵan. Mýmbaıǵa ushyp ketpek bolǵan mınıstr Indıra Gandı atyndaǵy halyqaralyq áýejaıǵa bara jatqan jolda kólik apatyna ushyraǵan. Oqıǵanyń tolyq mán-jaıy ázirshe belgisiz. Ony jedel arada aýrýhanaǵa jetkizgenimen dárigerler onyń ómirine arasha túse almady. N.Gadkarıdiń atap ótýinshe, saıasatkerdiń «júregi toqtap qalǵan».
Aıta keterligi, Úndistannyń jańa mınıstrler kabıneti 26 mamyr kúni ant qabyldaǵan bolatyn.
