Úndistannyń áýe kompanııasy «Delı-Almaty» baǵytynda reıs ashpaq
ASTANA. QazAqparat - Úndistannyń «SpiceJet» áýe kompanııasy Delı-Almaty baǵyty boıynsha ushýdy josparlap otyr, dep habarlaıdy QazAqparat tilshisi.
QR IIDM Azamattyq avıatsııa komıteti shet eldermen áýe qatynasyn keńeıtý jáne sheteldik áýe kompanııalaryn elimizge tartý boıynsha belsendi jumys júrgizýde.
«Úndilik «SpiceJet» áýe kompanııasy tıisti rásimderden ótip, Qazaqstan Respýblıkasyndaǵy sheteldik áýe tasymaldaýshyny akkredıtteý týraly kýáligine ıe boldy. Úndistannyń avıatsııalyq bılik oryndarynyń bekitýine sáıkes, «SpiceJet» kompanııasyna «Delı - Almaty - Delı» baǵyty boıynsha aptasyna 6 reıske ushýǵa quqyq berildi. Áýe kompanııasy atalǵan baǵyt boıynsha Boıng 737 ushaǵynda turaqty reısterdi iske qosýdy josparlap otyr», - delingen Azamattyq avıatsııa komıtetiniń málimetinde.
Bul reıstiń ashylýy elder arasyndaǵy saýda-ekonomıkalyq baılanystardy arttyrady. Qazaqstannyń tranzıttik áleýetin jáne týrızm salasyn damytýǵa yqpal etedi.
Aıta keteıik, 2018 jyldan bastap Úndistan azamattary úshin Qazaqstan arqyly tranzıtpen ótetin 72 saǵattyq vızasyz tártip engizilgen jáne bul 2019 jyldyń sońyna deıin uzartylǵan.
2018 jyly elimiz arqyly tranzıttik jolaýshylar sany 45% (2017 - 620 myń adam) artyp, 900 myń adamdy qurady.
«SpiceJet» - jergilikti jáne halyqaralyq reısterdi turaqty oryndaıtyn úndilik bıýdjettik áýe kompanııa. Іshki reısterden basqa, kompanııa ushaqtary Aýǵanstanǵa, Bangladeshke, Gonkongqa, Taılandqa, Shrı-Lankaǵa, Birikken Arab Ámirlikterine, Omanǵa jáne Maldıv araldaryna ushady.
