Úndistannyń Ambronol jáne Dok-1 Maks preparattary qaýipti – DDSU
BAKÝ. QazAqparat – Dúnıejúzilik densaýlyq saqtaý uıymy (DDSU) Ózbekstanda balalardyń ólimine ákep soqtyrǵan Úndistan preparattarynyń qaýiptiligi týraly eskertti, dep habarlaıdy QazAqparat tilshisi uıymǵa silteme jasap.
Másele Úndistanda Marion Biotech LTD farmatsevtıkalyq kompanııasy shyǵarǵan Ambronol jáne DOK-1 Max shárbattary týraly bolyp otyr.
DDSU bul ónimder sapa standarttaryna sáıkes kelmeıtinin aıtýda. Sebebi osy ýaqytqa deıin óndirýshi atalǵan uıymǵa ónimderdiń qaýipsizdigi men sapasyna kepildik beretin qujattar usynbaǵan.
Ózbekstan Densaýlyq saqtaý mınıstrligi eki ónimniń úlgilerine zerthanalyq taldaý jasap, ekeýiniń quramynda ruqsat etilmeıtin mólsherde dıetılenglıkol jáne/nemese etılenglıkol bar ekenin anyqtady.
Bul dárilerdiń quramyndaǵy ýytty zattar áserinen ish aýyrý, qusý, dıareıa, zár shyǵarýdyń buzylýy, bas aýrýy, psıhıkalyq jaǵdaıdyń ózgerýi jáne búırektiń ólimge ákeletin ótkir syrqaty bolýy múmkin.
DDSU atalǵan dárilerdiń basqa elderge nemese óńirlerge beıresmı naryq arqyly taralýy múmkin ekenin joqqa shyǵarmaıdy.
DDSU tıisti medıtsınalyq mekemelerdi qadaǵalaýdy kúsheıtýge jáne jetkizilim tizbeginde saqtyq tanytýǵa, sondaı-aq patsıentterge zııan keltirmeý úshin osy sapasyz ónimderdi anyqtap, aınalymnan shyǵarýǵa shaqyrdy.
Eske salaıyq, Ózbekstanda ótken jyldyń qyrkúıek-jeltoqsan aılarynda 19 adamnyń ólimi tirkelgen edi. Oǵan úndilik Marion Biotech kompanııasy shyǵarǵan DOK-1 Maks preparatyn qabyldaý sebep bolǵan. Zardap shekkenderdiń barlyǵy – alty jasqa tolmaǵan balalar.
7 qańtarda joǵaryda atalǵan sıropty ishken taǵy bir balanyń qaıtys bolǵany belgili boldy.
Foto: www.gazeta.uz
