Úndistannyń 450 mıgranty Katar qurylystarynda mert boldy
ÁBÝ-DABI. QazAqparat - Katardaǵy qurylys jumystarynda 450-ge tarta úndistandyq mıgranttar mert boldy. Osynshama adamnyń qaza bolýy 2012 jyldyń basynan 2013 jylǵy jeltoqsanǵa deıingi aralyqta tirkelgen, dep habarlady Katardaǵy Úndistan elshiligi.
Keltirilgen málimetter Doha 2022 jyly fýtboldan Álem chempıonatyna ázirlenip jatqan kezdegi jurtshylyq qysymy jaǵdaıynda jarııa boldy.
Statıstıka málimetterine qaraǵanda, Katarda aıyna ortasha eseppen Úndistannyń 20 jumysshysy mert bolady. Bul qaıǵyly oqıǵalardyń kóptep oryn alýy - ıaǵnı 27 oqıǵa - 2013 jyldyń tamyz aıynda boldy, dep atap ótedi elshilik. Oǵan aptap ystyq sebep boldy. Jazǵy ýaqytta Parsy shyǵanaǵyndaǵy elderde aýanyń temperatýrasy qyryq gradýstan asyp ketedi. Halyqaralyq quqyq qorǵaý uıymdary osy elderge nápaqa tabý úshin kelgen eńbek mıgranttarynyń «aýyr jaǵdaıyn» atap ótýde.
Úndistan elshiligi óz azamattarynyń qandaı jaǵdaıda mert bolǵanyn ashyp aıtpaıdy. Onyń málimetteri boıynsha, 2012 jyldyń sońynda Katardyń qurylys nysandarynda 500 myń úndistandyq jumys jasaǵan, bul Katar halqynyń tórtten birine teń.
Budan buryn brıtandyq «The Guardian» gazeti 2022 jylǵy fýtboldan álem chempıonatynyń qurylys nysandarynda Katarda jumys jasap jatqan Nepaldyń 400-den astam mıgranty qaza bolǵanyn habarlaǵan bolatyn.
Qazirgi kezde Halyqaralyq fýtbol federatsııasy Katarda álem chempıonaty ótetin merzimdi ázirge belgilegen joq. Kóptegen fýtbol sheneýnikteri ony qysqy merzimde ótkizý qajet dep sanaıdy, óıtkeni jazǵy aptap sportshylardyń oınaýyna aýyrlyq keltiredi.
