Úndistannan kelgen tanymal shahmatshy astanalyq búldirshinniń tusaýyn kesti

ASTANA. QazAqparat - Erteń klassıkalyq shahmattan 2023 jylǵy álem chempıony ataǵy úshin match bastalatyn St.Regis qonaqúıinde grossmeıster, Úndistan tarıhyndaǵy eń uly shahmatshy, shahmattan 15-shi álem chempıony Vıshı Anand bir jasqa tolǵan astanalyq kishkentaı Ábdirahmannyń tusaýyn kesti, dep habarlaıdy QazAqparat.

«Tusaýkeserdi osy aıǵa josparlap otyrǵanbyz. Dál qazir astanamyzda osyndaı aýqymdy shahmat merekesi ótip jatqandyqtan, biz táýekel dep dańqty shahmatshyǵa usynys jasadyq. Ol kisiniń usynysymyzdan bas tartpaǵanyna óte rızamyz», – dedi Ábdirahmannyń anasy.

Qazaqstannyń shahmat federatsııasy málim etkendeı, saltanatty shara bastalmas buryn shahmatshy balaǵa ósıetin aıtqan.

«Balanyń tusaýyn kesý men úshin mártebe. Ábdirahmanǵa bar jaqsylyqty, zor densaýlyq pen baqyt tileımin. Balam, ómir boıy seni baqytty etetin mamandyqty tańda», - dedi Anand.

Odan keıin shahmatshy jipti qıyp, balany anasymen birge aq kilem ústinen jeteledi. Kilemniń ekinshi basynda túrli kásipterge qatysty buıymdar daıyndaldy. Dástúr boıynsha náreste birinshi bolyp qolyn sozǵan zat onyń ómir jolyn anyqtaıdy. Qamshy, kitap, aqsha men shahmat aldyna qoıylǵan Ábdirahman aq ladıany tańdady. Keıinnen dástúr boıynsha Ábdirahmannyń ata-anasy Anandtyń ıyǵyna shapan japty.