Úndistanǵa áýe reısteriniń sany artady - Azamattyq avıatsııa komıteti
ASTANA. QazAqparat - Úndistanǵa áýe reısteriniń sany artady, dep habarlaıdy «QazAqparat» HAA QR IDM Azamattyq avıatsııa komıtetiniń baspasóz qyzmetine siltememen.
«Úndi eline 2004 jyldan beri turaqty túrde xalyqaralyq reıster jasalyp keledi. Eki el arasyndaǵy baǵyttarda jolaýshylar aǵyny jyl saıyn ósip, tranzıttik áleýeti joǵary qatynas joly bolyp tabylady. Sol sebepti, ótken jyldyń shilde aıynda burynnan bar «Almaty - Delı» arasyndaǵy baǵytqa «Astana - Delı» turaqty reısi qosyldy» delingen habarlamada.
Degenmen, komıtet mállimeti boıynsha, sońǵy jyldary qazaqstandyq tasymaldaýshylarǵa úndi tarapynan keıbir áýe kemelerin paıdalaný boıynsha, ıaǵnı texnıkalyq múmkindigi bola tura belgili bir ushaq túrlerin Delı baǵytynda qoldanýǵa tyıym salynyp kelgen. Bul óz kezeginde, áýe kemeleriniń parkin qoldaný tıimdiligin kemitip, keıbir reısterdiń keshigýine ákelip soǵatyn.
«Azamattyq avıatsııa komıtetiniń Úndi eliniń avıatsııalyq bılik ókilderimen júrgizgen kelissózderi nátıjesinde 2018 jyldyń naýryz aıynan bastap otandyq tasymaldaýshylarǵa Qazaqstan men Úndistan aralyǵynda qoldanystaǵy barlyq áýe kemelerin paıdalanýǵa ruqsat berildi. Bul sheshim eki el arasyndaǵy áýe qatynasyn nyǵaıtyp, reısterdiń ýaqytyly oryndalýyna, ushý jıiligin arttyrýǵa aıtarlyqtaı áser etedi» dep málim etti atalǵan komıtet baspasóz qyzmeti.
Aıta keteıik, bolashaqta qazaqstandyq áýe kompanııalary Mýmbaı qalasyna tikeleı áýe reısterin ashýdy josparlap otyr.
