Úndistandyq týrıster Almaty taýlaryn kórýge keledi – Elshi
NUR-SULTAN. QazAqparat – Úndistannyń Qazaqstandaǵy elshisi Prabhat Kýmar eki el arasyndaǵy yntymaqtastyqtyń negizgi baǵyttary jóninde áńgimeledi, dep habarlaıdy QazAqparat tilshisi.
«Búginde Úndistan men Qazaqstan kóptegen salalarda birlese jumys istep keledi. Úndistan – Qazaqstannyń táýelsizdigin qoldaǵan alǵashqy memleketterdiń biri. Aramyzda óte jaqsy qarym-qatynas ornady. Saıası deńgeıdegi saparlar jasaldy. Sońǵy 25 jylda Qazaqstannyń Tuńǵysh Prezıdenti Nursultan Nazarbaev Úndistanǵa 6 ret barǵan», - dedi Prabhat Kýmar elordada Úndistan táýelsizdigin toılaý barysynda.
Elshiniń aıtýynsha, 2018 jyly eki el arasyndaǵy taýar aınalymy 1,2 mlrd dollarǵa jetken nemese 25% artqan. Ásirese, energetıka, munaı, aýyl sharýashylyǵy salalaryna Úndistan erekshe qyzyǵýshylyq tanytyp otyr.
Sonymen birge, elshi Qazaqstannyń týrıstik áleýeti jóninde áńgimeledi.
«Qazaqstanǵa Úndistannan kóptegen týrıster keledi. Úndistanǵa da qazaqstandyqtar kóptep baryp júr dep oılaımyn. Áýe kompanııalary aptasyna jeti ret ushady, qyrkúıekten bastap, aptasyna toǵyz ret ushyrý josparlanyp otyr. 2018 jyly Qazaqstandaǵy Úndistan elshiligi 20 myńnan astam vıza berdi. Úndistandaǵy Qazaqstan elshiligi de osy shamada vıza rásimdegen. Bul qos memleket arasyndaǵy týrıster aǵynynyń artqanyn bildiredi. Úndistan turǵyndarynyń basym kópshiligi Qazaqstanǵa Almaty taýlaryn kórý úshin keledi», - dedi Prabhat Kýmar.
Onyń aıtýynsha, Qazaqstan men Úndistannyń mádenı yntymaqtastyǵy da damyp keledi. Elordada Úndistannyń mádenı ortalyǵy jumys isteıdi, onda tegin ıoga, bı sabaqtary ótedi.
Eske sala ketsek, astanada Úndistannyń táýelsizdik kúnine arnalǵan mádenı sharalar ótip jatyr.
QR Ulttyq kitaphanasynda «Ǵajaıyp Úndistan: tańǵalarlyq kópqyrly mádenıet» fotokórmesi ashyldy.
Esil jaǵalaýynda úndi ashanasy festıvali men úndi kınokórsetilimi ótedi.
