Úndistandyq kompanııa Túrkistan oblysynda qus sharýashylyǵyn damytpaq
TÚRKІSTAN. QazAqparat - Búgin oblys ákimi Janseıit Túımebaev Úndistannyń Venky's kompanııasynyń ókilderimen kezdesti. Úndistan naryǵynyń 90 paıyzǵa jýyǵyn qus etimen qamtamasyz etip otyrǵan alpaýyt kompanııa ókilderi Túrkistan oblysyna ınvestıtsııa salýǵa nıetti ekenin jetkizdi, dep habarlaıdy QazAqparat tilshisi.
Kezdesýde óńir basshysy oblysymyzda aýyl sharýashylyǵy salasyn damytýǵa tolyq múmkinik bar ekenin jetkizdi. Qus sharýashylyǵyn halyqaralyq deńgeıge kóterý arqyly eksport kólemin arttyrýǵa bolatynyn aıtyp, osy salaǵa jaýapty orynbasarlaryna úndistandyq ınvestormen iskerlik baılanysty naqtylaýdy tapsyrdy.
«Túrkistan oblysy Ózbekstan Respýblıkasymen shektesedi. Óńirden Batys Eýropa - Batys Qytaı Qytaı magıstrali ótedi. Jumys kúshi kóp ári tabıǵaty sharýashylyqqa qolaıly. Birneshe qus fabrıkasy bar. Biz ákimdik tarapynan qus sharýashylyǵyn damytyp, klaster qurýǵa árdaıym qoldaý kórsetýge daıynbyz. Eger ınvestorlar keletin bolsa, jer jáne ınfraqurylym máselesine de kómek kórsetiledi. Ekijaqty jobalar Úndistanǵa da, Qazaqstanǵa da paıdaly bolady dep oılaımyn. Birlesip jumys isteýge ázirmiz», - dedi J.Túımebaev.
Al, «Venkateshwara Hatcheries Private Limited» (VH group) kompanııasynyń operatsııalar jónindegi bas dırektory Murtuza Álı Ismaıl Magdým Túrkistanǵa kelýdegi maqsatyn túsindirdi. Investordyń aıtýynsha, kompanııa 1971 jyly qurylǵan. Tek Úndistanda ǵana emes, AQSh jáne Eýropa elderinde birlesken kásiporyndary men jobalary bar.
Qazir álemde Venky's degen brendimen tanylǵan alpaýyt kompanııa qus ósirýmen, jumyrtqa óndirýmen qatar jumyrtqa untaǵyn da kádege asyryp júr. Arnaıy zertteý ortalyqtarynda qus sharýashylyǵyna qajetti vaktsına shyǵarýmen de aınalysady. Osy derekterge toqtalǵan úndistandyq kompanııa basshysy kelissózder sátti aıaqtalsa, Túrkistan oblysynda jumys bastaýǵa daıyn ekenin málimdedi. Dálirek aıtsaq, «Ordabasy qus» jáne «Shymkent qus» JShS-men de birikken jobalardy júzege asyrýdy kózdep otyr.
