Úndistandyq kásipker ózine 200 myń dollar turatyn jeıde syılaǵan
ASTANA. QazAqparat - Úndistandyq iri toqyma fabrıkasynyń ıesi Pankaı Parah óziniń 45 jasqa tolýyna oraı 4 keli altynmen aptalǵan jeıde tiktirdi. Joǵary synamaly altynnan jasalǵan jeıdeniń jalpy quny 211myń dollardy quraıdy. Kásipkerdiń aıtýynsha, ol bul jeıdeni kópshiliktiń aldynda erekshelený úshin ǵana emes, sondaı-aq Gınnestiń rekordtar kitabyna ený úshin de jasatqan.
Biregeı jeıdeni jasaý úshin fabrıkanyń 20 sheberi qatysqan, eki aıǵa jýyq ýaqyt ketken kórinedi. Ony kez kelgen kirjýǵysh mashınada jýa berýge bolady.
Parahtyń aıtýynsha, ol burynnan altynǵa qumar eken, úıinen shyqqannyń ózinde kem degende 2-3 keli salmaǵy bar áshekeılerdi taǵyp shyǵatyn kórinedi. Al qaýipsizdik úshin únemi qasynda oqqaǵarlaryn ertip júredi. Úndistanda Pankaı Parah óziniń qaıyrymdylyǵymen tanymal. Ol jyl saıyn polıomıelıtpen aýyratyn 120 balaǵa ota jasaý úshin qarajat bólip turady dep jazady sheteldik BAQ.
