Úndistandyq áıeldiń asqazanynan dárigerler 1,5 kg áshekeı buıymdaryn aldy
NUR-SULTAN. QazAqparat – Úndistannyń Batys Bengalııa shtatynda dárigerler áıeldiń asqazanynan jalpy salmaǵy 1,5 kg bolatyn áshekeı buıymdaryn shyǵaryp aldy, dep habarlaıdy QazAqparat Indian Express-ke silteme jasap.
Dárigerlerdiń aıtýynsha, 26 jastaǵy kelinshek 5 jáne 10 rýpıılik 90-ǵa jýyq moneta jáne mys pen latýnnan soǵylǵan áshekeı buıymdardy jasyrmaq bolyp jutyp jibergen. Áshekeılerdiń arasynda tipti qolsaǵat ta bar bolyp shyqty.
Qyzdyń sheshesiniń aıtýynsha, ol keıde esin bilmeı qalatyn kórinedi. Áıel úıdegi áshekeı buıymdarynyń joǵala bastaǵanyn baıqaǵan. Al monetalardy qyz aǵasy jumys isteıtin dúkennen alǵan.
«Biz ony ańdyp júrdik, biraq ol sonda da bir amalyn taýyp, áshekeılerdi juta beripti. Sońǵy eki aıda mazasy ketti», - deıdi qyzdyń sheshesi.
Aqyr sońynda «temir jegish» qyzdy aýrýhanaǵa jatqyzýǵa týra kelgen. Onyń asqazany metalǵa tolǵanyn sol jerde dárigerler anyqtady. Artynsha, shuǵyl ota jasap, asqazanyn tazalady. Endi qyzdyń týystary ony psıhıatrǵa kórsetpek.
