Úndistandyq áıel 70 jasynda ana atandy
ASTANA. QazAqparat - Úndistan turǵyndarynyń biri 70 jasta alǵash ret ana bolý baqytyna bólendi, dep jazady Bangkok Post jelilik basylymy.
45 jastan keıin áıelderdiń bala kóterý múmkindigi aıtarlyqtaı tómendeıdi, al 50 jastan asqan analar deni saý bala týýy - sırek kezdesetin jaǵdaı dep sanalady. Áıelder 70 jastan asqan soń ana bolýdy armandamaıdy da, sebebi buǵan múmkindik óte az. Osyndaı jasta egde jastaǵy áıelder nemere nemese shóbere súıedi. Olaı bolǵanymen, Úndistanda 70 jastaǵy Daljınder Kaýr bári de múmkin ekenin dáleldedi.
Úndilik áıeldiń nekege turǵanyna 46 jyl bolsa da, bala kótere almaǵan. Alaıda Kaýr men onyń 79 jastaǵy jubaıy qartaısa da, ata-ana ataný úmitin úzbegen. Erli-zaıyptylar ol úshin reprodýktıvtik medıtsınaǵa júginbek bolyp, Harıana shtatynda ornalasqan otbasyn josparlaý ortalyǵyna barady.
Úndilik dárigerler keremet is atqara aldy - Daljınderge salynǵan uryq damyp, ol dúnıege deni saý, salmaǵy eki keli balany ákele aldy. Egde jastaǵy erli-zaıyptylardyń uly 19 sáýirde týylsa da, baspasóz ókilderine bul týraly tek jaqynda belgili boldy.
Úndilik basylymnyń atap ótýinshe, ata-ana atanǵan qarttar óte baqytty jáne Qudaıǵa sheksiz alǵysyn jaýdyryp jatyr.
Foto: AFP / East News
