Úndistandaǵy tártipsizdikter kezinde 8 adam kóz jumdy
ASTANA. QazAqparat - Úndistannyń soltústigindegi Harıana shtatynda bolǵan tártipsizdikter saldarynan sońǵy 2 kún ishinde 8 adam mert bolǵan. Taǵy 100-den astamy jaralandy, dep jazady 24.kz.
Munda sońǵy ýaqytta ereýilder tolastamaı tur. Narazy jurt memlekettik mekemeler men joǵary oqý oryndarynda «djat» etnıkalyq tobyna bólinetin kvotalardy arttyrýdy talap etýde. Ereýilshiler joldardy jaýyp tastap, polıtsııa kóligine ot qoıǵan.
Ashynǵan halyq Mýnak arnasyndaǵy qurylǵylardy da syndyryp ketipti. Saldarynan kórshiles Delı qalasy turǵyndarynyń aýyzsýsyz qalatyn túri bar. Aımaqtaǵy 8 birdeı óńirde kommendanttyq saǵat jarııalandy. Qazir Harıana shtatyna polıtsııa men áskerdiń qosymsha kúshteri tartylyp jatyr.
Foto: polit.ru